ورلڈ کپ 2026 میں شاندار گول، جذباتی لمحات اور سنسنی خیز مقابلے دیکھنے کو ملے لیکن اس ٹورنامنٹ نے تفریح اور موسیقی کے اعتبار سے بھی دنیا بھر کے شائقین کو حیران کر دیا۔
ورلڈ کپ کی تاریخ کے پہلے فائنل ہاف ٹائم شو میں صرف 11 منٹ کے اندر میڈونا، شکیرا، بی ٹی ایس، جسٹن بیبر، برنا بوائے، کولڈ پلے، دی مپیٹس، برازیل کے دو لیجنڈ فٹبالرز، ٹام کروز، پوسٹ میلون، آئی شو اسپیڈ اور کئی وائرل پرفارمنسز کو یکجا کیا گیا۔ یوں محسوس ہوا جیسے فٹبال میچ کے ساتھ ساتھ ایک عالمی میوزک فیسٹیول بھی جاری ہو
ہاف ٹائم شو کا آغاز پاپ اسٹار میڈونا کی منفرد انٹری سے ہوا جہاں برازیل کے لیجنڈ فٹبالرز رونالڈو اور رونالڈینیو انہیں ڈون بگی میں اسٹیڈیم کے اندر لائے۔ اس کے بعد میڈونا نے اپنے مقبول گانے “Music” کا خصوصی ورژن پیش کیا۔
کینیڈین گلوکار جسٹن بیبر نے اکوسٹک انداز میں “Everything Hallelujah” پیش کیا تاہم ان کی نسبتاً پرسکون پرفارمنس نے شو کی رفتار اچانک سست کر دی اور یہ سوشل میڈیا پر بحث کا موضوع بن گئی۔
کولمبیا کی عالمی شہرت یافتہ گلوکارہ شکیرا نے نائجیریا کے گلوکار برنا بوائے کے ساتھ ٹورنامنٹ کا آفیشل گانا “Dai Dai” پیش کیا جبکہ یوگنڈا کے معروف ڈانس گروپ گھیٹو کڈز نے اپنی شاندار رقص پرفارمنس سے حاضرین کے دل جیت لیے۔
جنوبی کوریا کے مقبول میوزک گروپ بی ٹی ایس نے اپنے عالمی ہٹ گانے “Dynamite” کی پرفارمنس سے اسٹیڈیم کا ماحول گرما دیا جبکہ مشہور یوٹیوبر آئی شو اسپیڈ نے فائنل سے قبل اپنے ورلڈ کپ گانے “Champions” کے ذریعے افتتاحی تقریب میں جوش بھر دیا۔
تقریب میں دی مپیٹس نے آرکسٹرا کے ساتھ مل کر “Seven Nation Army” پیش کیا، جسے شائقین نے خوب سراہا جبکہ ہالی ووڈ اسٹار ٹام کروز نے فائنل سے قبل اسٹیڈیم میں موجود شائقین سے خطاب کرتے ہوئے اسپین اور ارجنٹینا کی ٹیموں کا تعارف کرایا۔
اختتامی تقریب میں امریکی گلوکار پوسٹ میلون نے اپنا نیا گانا “Chrome Heartbreaker” متعارف کرایا اور بعد ازاں سوے لی کے ساتھ اپنا مشہور گانا “Sunflower” بھی پیش کیا۔
اس کے علاوہ جینیفر ہڈسن، روبی ولیمز، نکول شیرزنگر، لورا پاؤسینی اور ماریا بیسیرا سمیت متعدد عالمی فنکار بھی تقریب کا حصہ بنے۔
رنگا رنگ پرفارمنسز، عالمی شہرت یافتہ فنکاروں کی شرکت اور جدید اسٹیج پروڈکشن نے ورلڈ کپ 2026 کے فائنل کو محض ایک فٹبال میچ نہیں بلکہ ایک عالمی تفریحی شو میں تبدیل کر دیا جس کے مناظر دنیا بھر میں سوشل میڈیا پر وائرل ہو رہے ہیں۔
