امریکا نے ایران کے خلاف مسلسل نویں رات بھی وسیع فضائی اور بحری کارروائیاں جاری رکھتے ہوئے فوجی کمانڈ سینٹرز، فضائی دفاعی نظام، میزائل اور ڈرون اڈوں، بندرگاہوں اور مواصلاتی تنصیبات کو نشانہ بنایا، جبکہ ایران نے بھی امریکی اڈوں پر نئے میزائل حملوں، ایک امریکی ڈرون مار گرانے اور آبنائے ہرمز میں 2 آئل ٹینکرز کے دھماکوں کا دعویٰ کیا ہے۔ دونوں ممالک کے درمیان بڑھتی ہوئی کشیدگی کے باعث خطے میں جنگ کے مزید پھیلنے کے خدشات بھی بڑھ گئے ہیں۔
امریکا نے ایران کے خلاف مسلسل نویں رات بھی فضائی حملوں کا سلسلہ جاری رکھتے ہوئے ملک بھر میں فوجی اور اسٹریٹجک اہداف کو نشانہ بنایا، جبکہ ایران نے بھی امریکی مفادات کے خلاف جوابی کارروائیوں کا دعویٰ کرتے ہوئے متعدد میزائل داغنے، ایک امریکی ڈرون تباہ کرنے اور آبنائے ہرمز کو غیر محفوظ قرار دینے کا اعلان کیا ہے۔
امریکی سینٹرل کمانڈ (سینٹ کام) کے مطابق کارروائیاں اتوار کی شب امریکی وقت کے مطابق رات 10 بجے مکمل ہوئیں۔ بیان میں کہا گیا کہ حملوں میں ایرانی فوجی کمانڈ سینٹرز، فضائی دفاعی نظام، ساحلی نگرانی کے مراکز، بحری صلاحیتوں، میزائل اور ڈرون لانچنگ سائٹس اور مواصلاتی نیٹ ورک کو نشانہ بنایا گیا۔
سینٹ کام کے مطابق ان کارروائیوں کا مقصد ایران کی اس صلاحیت کو مزید محدود کرنا تھا جس کے ذریعے وہ آبنائے ہرمز سے گزرنے والے تجارتی جہازوں اور شہری بحری عملے کو نشانہ بنا سکتا ہے۔ امریکی فوج نے کہا ہے کہ وہ صدر کے احکامات کے تحت ایران کو اس کی کارروائیوں کا جواب دے رہی ہے اور خطے میں موجود امریکی افواج مکمل طور پر چوکس اور ہر قسم کی کارروائی کے لیے تیار ہیں۔
ادھر ایران میں ایک اور رات شدید بمباری کی زد میں رہی۔ شمال مغربی شہر تبریز میں پہلی مرتبہ کم از کم 3 دھماکوں کی آوازیں سنی گئیں، جبکہ جنوب مغربی علاقوں بوشہر اور ہرمزگان میں بھی متعدد دھماکوں کی اطلاعات موصول ہوئیں۔
ہرمزگان صوبے کے اہم ساحلی شہروں جاسک اور سیریک، جو آبنائے ہرمز کی نگرانی کے حوالے سے غیر معمولی تزویراتی اہمیت رکھتے ہیں، ایک مرتبہ پھر امریکی فضائی حملوں کی زد میں رہے۔ امریکی فورسز گزشتہ کئی راتوں سے انہی علاقوں میں سب سے زیادہ شدید بمباری کر رہی ہیں۔
جنوب مشرقی صوبے سیستان و بلوچستان کے کنارک اور بندرگاہی شہر چابہار میں بھی فضائی حملوں کی اطلاعات موصول ہوئیں، جبکہ صوبہ خوزستان کے اہم بندرگاہی شہروں ماہشہر اور بندر امام کو بھی امریکی فورسز نے نشانہ بنایا۔
غیر ملکی میڈیا کے مطابق جنوب مغربی ایران کے شہر خورموج میں امریکی حملوں کے نتیجے میں متعدد علاقوں کی بجلی منقطع ہوگئی۔ مقامی حکام کا کہنا ہے کہ خورموج، جو بوشہر صوبے کے دشتی ضلع کا انتظامی مرکز ہے، آبنائے ہرمز کے قریب واقع ہونے کے باعث اسٹریٹجک اہمیت رکھتا ہے اور یہاں پاسداران انقلاب کی بحری تنصیبات بھی موجود ہیں۔
ایران کی ایٹمی توانائی تنظیم نے بھی دعویٰ کیا ہے کہ زیر تعمیر دارخوین جوہری بجلی گھر کے مقام پر متعدد میزائل یا گولے آکر گرے، تاہم نقصان کی تفصیلات جاری نہیں کی گئیں۔
’الجزیرہ‘ نے ایرانی سرکاری خبر رساں ادارے ارنا کے حوالے سے بتایا ہے کہ ایران نے صوبہ لرستان سے میزائلوں کی نئی کھیپ داغی، جن کا ہدف خطے میں موجود امریکی فوجی اڈے اور دیگر امریکی عسکری اثاثے تھے۔
اردن: متعدد امریکی طیارے اور 20 ہینگرز تباہ
پاسداران انقلاب نے دعویٰ کیا ہے کہ اردن کے عقبہ ایئرپورٹ پر موجود امریکی C-17 ٹرانسپورٹ طیاروں اور P-8 نگرانی کے طیاروں کو بیلسٹک میزائلوں سے نشانہ بنایا گیا، جس سے متعدد طیاروں کو شدید نقصان پہنچا۔ ایرانی سرکاری ٹی وی کے مطابق موافق سلطی (الازرق) فضائی اڈے پر امریکی افواج کے زیر استعمال 20 ہینگر بھی تباہ کر دیے گئے ہیں۔
غیرملکی میڈیا نے ایرانی خبر رساں ادارے ’مہر‘ کے حوالے سے بتایا ہے کہ مغربی صوبے کرمانشاہ کے شہر اسلام آبادِ غرب کے قریب ایک امریکی MQ-9 ڈرون کو پاسداران انقلاب کی فضائی دفاعی فورس نے جدید دفاعی نظام کے ذریعے مار گرایا۔
پاسداران انقلاب نے یہ دعویٰ بھی کیا ہے کہ گزشتہ شب آبنائے ہرمز میں 2 آئل ٹینکر دھماکوں کے بعد رک گئے۔ ایرانی حکام کے مطابق یہ جہاز امریکی دباؤ کے تحت اس حساس آبی گزرگاہ سے گزرنے کی کوشش کر رہے تھے۔ پاسداران انقلاب نے خبردار کیا کہ جب تک خطے میں امریکی فوجی کارروائیاں جاری رہیں گی، آبنائے ہرمز تیل، گیس اور دیگر تجارتی سامان کی نقل و حمل کے لیے محفوظ نہیں رہے گی۔
کویت: علی السالم ایئربیس پر امریکی فوجی تنصیبات نشانہ بن گئیں
ایران کے پاسدارانِ انقلاب نے دعویٰ کیا ہے کہ اس نے اپنی تازہ ترین فوجی کارروائی کے دوران کویت میں واقع علی السالم ایئر بیس پر موجود امریکی فوجی تنصیبات کو نشانہ بنایا ہے۔
پاسدارانِ انقلاب کا کہنا ہے کہ ڈرون حملے کے نتیجے میں امریکی افواج کا ابتدائی وارننگ ریڈار سسٹم تباہ ہوگیا۔ بیان میں مزید دعویٰ کیا گیا کہ الگ الگ حملوں میں امریکی فضائی سازوسامان کے ایک گودام اور MQ-9 ڈرونز رکھنے والے ہینگر کو بھی نشانہ بنایا گیا، جس کے نتیجے میں متعدد امریکی طیاروں میں آگ بھڑک اٹھی۔
تاہم ایران کے ان دعوؤں کی آزاد ذرائع یا امریکی حکام کی جانب سے تاحال تصدیق نہیں کی گئی ہے، اور نہ ہی کویتی حکام نے اس حوالے سے کوئی باضابطہ بیان جاری کیا ہے۔
شمالی عراق میں ایک امریکی فوجی ہلاک
امریکی فوج نے شمالی عراق میں ایک اور فوجی کی ہلاکت کی تصدیق بھی کی ہے۔ سینٹ کام کے مطابق 18 جولائی کو ایک ایرانی ڈرون کے ملبے میں موجود نہ پھٹنے والے دھماکا خیز مواد کو ناکارہ بنانے کے دوران ہونے والے کنٹرولڈ دھماکے میں ایک امریکی اہلکار ہلاک جبکہ دوسرا معمولی زخمی ہوگیا۔ ہلاک ہونے والے فوجی کی شناخت ظاہر نہیں کی گئی۔
امریکی حکام کے مطابق ایران کے خلاف جنگ شروع ہونے کے بعد سے ہلاک ہونے والے امریکی فوجیوں کی تعداد 17 ہوگئی ہے۔
دریں اثنا امریکی صدر ڈونلڈ ٹرمپ نے کہا ہے کہ امریکا ایران پر ’بہت سخت‘ حملے کر رہا ہے تاکہ ہلاک ہونے والے امریکی فوجیوں کو خراجِ عقیدت پیش کیا جا سکے۔
ورلڈ کپ فائنل کے بعد واشنگٹن واپسی پر صحافیوں سے گفتگو کرتے ہوئے ٹرمپ نے کہا، ’ہم نے آج رات بھی ایران کو بہت سخت نشانہ بنایا، اور یہ ہم نے اپنے عظیم محب وطن فوجیوں کے اعزاز میں کیا۔‘
انہوں نے امریکی فوجیوں کی ہلاکت پر افسوس کا اظہار کرتے ہوئے کہا کہ وہ اس مقصد کے لیے لڑ رہے تھے کہ ’ایران کبھی بھی جوہری ہتھیار حاصل نہ کر سکے۔‘
