امریکا نے ایران پر مسلسل ساتویں رات بھی فضائی حملے جاری رکھتے ہوئے پہلی بار ملک کے وسطی علاقوں کو نشانہ بنایا، جبکہ ایران نے خلیجی ممالک اور آبنائے ہرمز میں جوابی کارروائیوں کا دعویٰ کیا ہے۔ دوسری جانب اقوام متحدہ نے شہری تنصیبات پر حملوں کی مذمت کرتے ہوئے فریقین سے تحمل کا مظاہرہ کرنے کی اپیل کی ہے۔
امریکا اور ایران کے درمیان جاری جنگ مزید شدت اختیار کر گئی ہے۔ امریکی فوج نے مسلسل ساتویں رات ایران پر فضائی حملے کرتے ہوئے اس بار جنوبی ساحلی علاقوں کے ساتھ ساتھ وسطی ایران میں بھی مختلف اہداف کو نشانہ بنایا، جس سے تنازع مزید خطرناک مرحلے میں داخل ہو گیا۔
الجزیرہ کی لائیو کوریج کے مطابق امریکی حملوں میں ہرمزگان، بوشہر، یزد، فارس، اہواز، قشم جزیرے اور سیریک سمیت متعدد علاقوں میں دھماکوں کی اطلاعات موصول ہوئیں۔ ایرانی حکام کے مطابق ہرمزگان صوبے میں امریکی حملوں کے نتیجے میں کم از کم 3 افراد ہلاک اور 8 زخمی ہوئے، جبکہ یزد کے قریب گرنے والے امریکی میزائل سے کسی جانی نقصان کی اطلاع نہیں ملی۔
ایرانی پاسداران انقلاب (آئی آر جی سی) نے دعویٰ کیا ہے کہ اس نے بوشہر کے قریب ایک امریکی MQ-9 ڈرون مار گرایا، بحرین میں امریکی ڈرون ڈپو اور مصنوعی ذہانت کے ایک مرکز کو نشانہ بنایا، جبکہ آبنائے ہرمز میں امریکی حمایت یافتہ 4 آئل ٹینکروں کو میزائل اور ڈرون کارروائی کے ذریعے روک دیا گیا۔ ایرانی میڈیا کے مطابق 2 آئل ٹینکروں میں بارودی سرنگوں والے علاقے سے گزرنے کے بعد آگ بھی لگ گئی۔
ادھر امریکی سینٹرل کمان (سینٹکام) نے کہا ہے کہ ایران پر بحری ناکہ بندی کے دوران 4 تجارتی جہازوں کا رخ موڑا گیا، ایک جہاز کو غیر فعال کیا گیا اور ایک پر چڑھائی بھی کی گئی۔
ایران نے خلیجی ممالک کی جانب بھی حملے جاری رکھنے کا دعویٰ کیا، جبکہ کویت، بحرین، قطر اور اردن میں خطرے کے سائرن بجائے گئے۔ کویت نے متعدد فوجیوں کے زخمی ہونے کی تصدیق کی، اردن نے اپنی فضائی حدود میں کئی میزائل مار گرانے کا اعلان کیا، جبکہ قطر میں راکٹوں کے ملبے سے ایک بچے کے زخمی ہونے کی اطلاع ملی۔ سعودی عرب نے الخرج اور ینبع میں جاری حفاظتی انتباہ بعد ازاں ختم کرنے کا اعلان کیا۔
دوسری جانب اقوام متحدہ کے سیکریٹری جنرل انتونیو گوتریس نے ایران اور خلیجی خطے میں شہری تنصیبات پر حملوں کو ’ناقابل قبول‘ قرار دیتے ہوئے فوری تحمل اور کشیدگی میں کمی پر زور دیا۔
ادھر سیٹلائٹ تصاویر میں بوشہر کے جوہری تنصیب کے کمپلیکس کو پہنچنے والے نئے نقصان کے آثار بھی سامنے آئے ہیں۔ امریکی حملوں کے ساتھ ساتھ غزہ میں اسرائیلی کارروائیاں بھی جاری رہیں، جہاں نصیرات پناہ گزین کیمپ میں جنازے پر حملے میں کم از کم 7 فلسطینی جاں بحق ہوگئے۔
واضح رہے کہ امریکی حملوں کا دائرہ ایران کے اندرونی علاقوں تک پھیل جانا اس بات کی علامت ہے کہ جنگ ایک نئے اور زیادہ خطرناک مرحلے میں داخل ہو چکی ہے، جس کے اثرات پورے مشرق وسطیٰ کی سلامتی، عالمی توانائی کی ترسیل اور بین الاقوامی تجارت پر مرتب ہو سکتے ہیں۔
