امریکا میں پاکستان کے سفیر رضوان سعید شیخ نے امریکی بین الاقوامی ترقیاتی مالیاتی کارپوریشن (ڈی ایف سی) کے چیف ایگزیکٹو آفیسر بینجمن بلیک سے ملاقات کی، جس میں پاکستان اور ڈی ایف سی کے درمیان شراکت داری، جاری اور مجوزہ منصوبوں اور مختلف شعبوں میں سرمایہ کاری کے فروغ پر تبادلہ خیال کیا گیا۔
سفیر پاکستان نے ڈی ایف سی کی جانب سے توانائی، انفراسٹرکچر، معدنیات، آئی ٹی اور بندرگاہوں سمیت اہم شعبوں میں سرمایہ کاری میں دلچسپی کو سراہا، جبکہ دونوں فریقین نے جاری اور ممکنہ منصوبوں پر پیشرفت کا جائزہ لیتے ہوئے فوکل پرسنز بھی نامزد کیے۔
اس موقع پر رضوان سعید شیخ نے بینجمن بلیک کو فیفا ورلڈ کپ کے لیے پاکستان میں تیار کیا جانے والا آفیشل فٹبال ’ٹرائی اونڈا‘ تحفے میں پیش کیا۔ انہوں نے کہا کہ ورلڈکپ کے لیے پاکستانی ساختہ فٹبال کا مسلسل انتخاب ملک کے لیے باعثِ فخر ہے، جبکہ بینجمن بلیک نے بھی ’ٹرائی اونڈا‘ کے معیار کو سراہا۔
دونوں رہنماؤں نے پاکستان کی سماجی و معاشی ترقی، بنیادی ڈھانچے کی بہتری اور پاک۔امریکا اقتصادی شراکت داری کو مزید مضبوط بنانے کے عزم کا اعادہ کیا۔
