محکمہ موسمیات کے مطابق بحیرۂ عرب سے آنے والی مرطوب ہوائیں ملک کے بالائی اور وسطی علاقوں میں داخل ہو رہی ہیں، جبکہ مغربی ہواؤں کا سلسلہ بھی بالائی علاقوں پر اثر انداز ہے، جس کے باعث بعض علاقوں میں بارش اور گرج چمک کا امکان ہے۔
منگل کے روز ملک کے بیشتر علاقوں میں موسم گرم اور حبس زدہ رہنے کی توقع ہے، تاہم کشمیر، بالائی خیبرپختونخوا، شمال مشرقی پنجاب اور گلگت بلتستان میں کہیں کہیں آندھی اور گرج چمک کے ساتھ بارش کا امکان ہے۔
مزید پڑھیں:بالائی علاقوں میں گلیشیائی جھیلیں پھٹنے کا خطرہ، محکمہ موسمیات کا الرٹ، سیاحوں کے لیے ہدایات جاری
اسلام آباد اور گرد و نواح میں بھی منگل کو موسم گرم اور شدید حبس والا رہے گا۔
پنجاب کے بیشتر اضلاع میں موسم گرم اور مرطوب رہے گا، تاہم راولپنڈی، مری، گلیات، چکوال، جہلم، منڈی بہاؤالدین، گجرات، گوجرانوالہ، حافظ آباد، لاہور، شیخوپورہ، ساہیوال، سیالکوٹ، نارووال اور اوکاڑہ میں چند مقامات پر آندھی اور گرج چمک کے ساتھ بارش متوقع ہے۔
خیبرپختونخوا کے بیشتر اضلاع میں موسم گرم اور حبس زدہ رہے گا، جبکہ دیر، چترال، سوات، کالام، مالم جبہ، کوہستان، شانگلہ، بٹگرام، مانسہرہ، ایبٹ آباد، پاراچنار، بنیر، پشاور، کرم، کوہاٹ اور وزیرستان میں کہیں کہیں بارش اور گرج چمک کا امکان ہے۔
سندھ کے بیشتر اضلاع میں موسم گرم اور مرطوب رہے گا، جبکہ وسطی اور بالائی اضلاع میں دن کے اوقات میں شدید گرمی پڑنے کا امکان ہے۔ تاہم تھرپارکر، عمرکوٹ، مٹھی، سکھر، جیکب آباد، کراچی اور ساحلی علاقوں میں جزوی ابر آلود موسم کے ساتھ چند مقامات پر آندھی اور گرج چمک کے ساتھ بارش متوقع ہے۔
بلوچستان کے بیشتر اضلاع میں موسم گرم اور حبس زدہ رہے گا، تاہم خضدار، ژوب اور ملحقہ علاقوں میں چند مقامات پر بارش اور گرج چمک کی پیش گوئی کی گئی ہے۔
محکمہ موسمیات کے مطابق بدھ کے روز کشمیر میں جزوی ابر آلود موسم کے ساتھ چند مقامات پر بارش اور گرج چمک کا امکان برقرار رہے گا، جبکہ منگل کو گلگت بلتستان میں بھی بعض علاقوں میں بارش اور گرج چمک متوقع ہے۔
