میٹا کی زیرِ ملکیت مقبول پیغام رسانی ایپ واٹس ایپ نے صارفین کے لیے آن لائن افراد کی شناخت مزید آسان بنانے کے مقصد سے نئے گرین ڈاٹ (Green Dot) فیچر کی آزمائش شروع کر دی ہے۔
یہ فیچر گزشتہ ماہ اینڈرائیڈ بیٹا صارفین کو فراہم کیا گیا تھا، جبکہ اب آئی فون کے TestFlight بیٹا صارفین کو بھی مرحلہ وار اس تک رسائی دی جا رہی ہے۔
نئے فیچر کے تحت اگر کوئی صارف واٹس ایپ پر آن لائن ہوگا تو اس کی پروفائل تصویر کے ایک کونے میں ایک چھوٹا سا سبز نقطہ نظر آئے گا، جس سے یہ فوری طور پر معلوم ہو سکے گا کہ وہ اس وقت ایپ استعمال کر رہا ہے۔
فی الحال یہ سبز نقطہ صرف چیٹ انفارمیشن (Chat Info) اسکرین پر دکھائی دیتا ہے، یعنی جب کسی چیٹ میں موجود رابطے کے نام پر ٹیپ کیا جائے۔ یہ فیچر ابھی مرکزی چیٹ لسٹ یا چیٹ ونڈو میں دستیاب نہیں ہے۔
واٹس ایپ کے مطابق گرین ڈاٹ صرف انہی صارفین کے لیے ظاہر ہوگا جنہوں نے اپنی Last Seen and Online حیثیت دوسروں کو دکھانے کی اجازت دے رکھی ہوگی۔ اگر کسی صارف نے اپنی آن لائن حیثیت کو پرائیویسی سیٹنگز کے ذریعے مخفی رکھا ہے تو اس کے لیے بھی گرین ڈاٹ ظاہر نہیں ہوگا۔
کمپنی کا کہنا ہے کہ مستقبل میں یہ فیچر موجودہ Online تحریری لیبل کی جگہ لے لے گا، تاکہ صارفین ایک نظر میں جان سکیں کہ ان کا رابطہ اس وقت دستیاب ہے یا نہیں۔ جیسے ہی کوئی صارف واٹس ایپ بند کرے گا، گرین ڈاٹ بھی غائب ہو جائے گا، جس سے حقیقی وقت میں آن لائن سرگرمی کی عکاسی ہوگی۔
واٹس ایپ مستقبل میں ایک نئے Contacts Hub پر بھی کام کر رہا ہے، جہاں صارفین اپنے آن لائن یا حال ہی میں فعال رہنے والے رابطوں کو ایک ہی جگہ دیکھ سکیں گے، اور گرین ڈاٹ اس نظام کا اہم حصہ ہوگا۔
فی الحال یہ فیچر محدود تعداد میں آئی او ایس بیٹا صارفین کو مرحلہ وار فراہم کیا جا رہا ہے، جبکہ بعض ایپ اسٹور صارفین کو بھی آزمائشی بنیادوں پر اس تک رسائی مل سکتی ہے۔ تاہم واٹس ایپ نے ابھی تک اس بات کا اعلان نہیں کیا کہ گرین ڈاٹ فیچر مستحکم (Stable) ورژن کے تمام صارفین کے لیے کب جاری کیا جائے گا۔
