خانہ کعبہ کو آج غسل دینے کی سالانہ روح پرور تقریب 3 بنیادی مراحل میں انجام دی جائے گی، جس کے لیے تمام تیاریاں انتہائی احتیاط اور باریک بینی سے مکمل کر لی گئی ہیں۔
حرمین شریفین کی دیکھ بھال کرنے والی جنرل اتھارٹی کے مطابق غسلِ کعبہ کا عمل 3 مراحل پر مشتمل ہوگا، جن میں تیاری، غسل اور بعد ازاں خوشبو و بخور سے معطر کرنا شامل ہے۔
یہ تمام مراحل خانہ کعبہ کے تقدس اور مسلمانوں کے دلوں میں اس کے عظیم مقام کے شایانِ شان انتہائی اہتمام کے ساتھ انجام دیے جائیں گے۔
اتھارٹی کے مطابق تقریب کے لیے 15 لیٹر آبِ زمزم، 15 لیٹر عرقِ گلاب، 15 لیٹر گلاب کا تیل اور 100 ملی لیٹر عود کا تیل تیار کیا گیا ہے، جنہیں غسل اور خوشبو کے مراحل میں استعمال کیا جائے گا۔
حرمین شریفین انتظامیہ کا کہنا ہے کہ اس عالمی مذہبی تقریب میں استعمال ہونے والا تمام سامان پیشگی طور پر جدید ترین معیار اور اعلیٰ سروس سسٹمز کے مطابق تیار کیا گیا ہے تاکہ غسلِ کعبہ کا عمل نہایت منظم، محفوظ اور باوقار انداز میں مکمل کیا جا سکے۔
