تحصیل کچہری کہوٹہ میں پیشی کے بعد سینٹرل جیل اڈیالہ راولپنڈی منتقلی کے دوران 14 حوالاتی تھانہ سہالہ کے علاقے چکیاں کے مقام پر قیدی وین سے فرار ہوگئے، 4 کو پولیس نے دوبارہ گرفتار کرلیا 10 تاحال فرار ہیں۔
پولیس حکام کے مطابق تحصیل کچہری کہوٹہ میں پیشی کے بعد اڈیالہ گارڈ کا عملہ 36 حوالاتیوں کو اڈیالہ جیل واپس لے کر جارہا تھا جو مختلف مقدمات میں ملوث تھے کہ تھانہ سہالہ اسلام آباد کے علاقے چیکیاں سٹاپ کے قریب قیدی وین کے پولیس عملے کو جھگڑے اور شور کی آواز سنائی دی جس پر انچارج سب انسپکٹر امتیاز نے عملے کے ہمراہ وین کے اسیران والا دروازہ کھولا تو اچانک نامعلوم ملزمان کی جانب آنکھوں میں مرچیں پھینکی گئیں اور اس میں سوار 36 میں سے 14 ملزمان مخلتف سمتوں میں فرار ہوگئے۔
اسیران کے فرار ہونے پر پولیس عملے میں بھگڈرمچ گئی اور دیگر اہلکاروں نے فرار ہوتے وقت چار ملزمان کو دوبارہ تحویل میں لے لیا اور اعلی حکام کو اطلاع دی۔
سی پی او راولپنڈی خالد ہمدانی نے واقعے کا نوٹس لیا اور ایس ایس پی آپریشن ملک طارق محبوب سمیت ایس پی صدر انعم شیر کو خود موقع پر پہنچ کر سرچ آپریشن و انکوائری کی ہدایات دیں۔
ایس ایس پی آپریشن راولپنڈی ملک طارق محبوب کی سربراہی میں راولپنڈی کے دو تھانوں تھانہ کہوٹہ اور تھانہ کلرسیداں کی پولیس اسلام آباد کے تھانہ سہالہ کہ پولیس کے ساتھ مل کر فرار ہونے والے ملزمان کی تلاش کے لیے سرچ آپریشن میں مصروف رہی لیکن دس اسیران میں کسی کو بھی قابو نہ کیا جاسکا۔
دوسری جانب راولپنڈی پولیس نے سینٹرل جیل اڈیالہ کی انتظامیہ کے ساتھ مل کر فرار ہونے والے اسیران کے الگ الگ پروفائل بنانے شروع کردیے کہ کون کس جرم میں ملوث تھا اور کس علاقے کا رہائشی ہے۔
راولپنڈی پولیس کے ترجمان کا کہنا تھا کہ فرار ہوئے ملزمان زیر سماعت مقدمات کے ملزمان ہیں، واقعہ سہالہ ضلع اسلام آباد کی حدود میں پیش آیا، متعلقہ پولیس سے کوآرڈینیشن جاری ہے، ابتدائی تحقیقات کے مطابق وین میں قیدیوں کی آپس میں شدید لڑائی ہوئی جس کے بعد واقعہ پیش آیا، فرار ہونے والوں کو گرفتار کر کے قانون کے مطابق کارروائی کی جائے گی جبکہ واقعہ کے حوالے سے سینئر افسران کی زیر نگرانی تحقیقات کا بھی آغاز کر دیا گیا ہے، ذمہ داران کے خلاف سخت محکمانہ کارروائی کی جائے گی۔
