ملک کے کئی حصوں میں موسلادھار بارش کا سلسلہ وقفے وقفے سے جاری ہے، خیبرپختونخوا، پنجاب اور بلوچستان میں طوفانی بارش اور پہاڑوں پر برفباری سے جاتی سردی ٹھہر گئی۔
ننکانہ صاحب، خانیوال، وہاڑی اور حجرہ شاہ مقیم سمیت رات گئے پنجاب کے مختلف اضلاع میں موسلادھار بارش سے جل تھل ایک ہو گیا اور نشیبی علاقوں میں بارش کا پانی جمع ہوگیا۔
مختلف اضلاع میں بارش کے ساتھ ہی کئی فیڈر ٹرپ ہونے سے بجلی کی فراہمی معطل ہوگئی جبکہ وادی نیلم، استور اور کالام میں برفباری کے باعث سردی کی شدت میں اضافہ ہوگیا۔
محکمہ موسمیات نے مزید بارش اور برفباری کی پیشگوئی کردی، آزاد کشمیر، مری، گلیات اور ایبٹ آباد سمیت بالائی علاقوں میں آج مزید بارش اور برفباری کا امکان ہے جبکہ لینڈ سلائیڈنگ کا بھی خطرہ ہے، سڑکوں پر پھسلن کے باعث ٹریفک کی روانی متاثر ہونے کا خدشہ ہے۔
وادی نیلم میں برفانی تودے تلے دبے 3 افراد کی لاشیں نہ نکالی جاسکیں
دوسری جانب ملک بھر میں طوفانی بارش اور برفباری تھم نہ سکی، وادی نیلم میں دبے 3 افراد کے لیے ریسکیو آپریشن روک دیا گیا، جمرود میں پہاڑی تودہ گرنے سے ایک شخص جاں بحق ہوگیا۔
بارش اور برفباری کے باعث آزاد کشمیر میں لینڈ سلائیڈنگ سے وادی نیلم اور وادی لیپہ کا زمینی رابطہ منقطع ہوگیا، پیرچناسی میں پھنسے تمام سیاحوں کو ریسکیو کرلیا گیا، وادی نیلم میں برفانی تودے تلے دبے 3 افراد کی لاشیں نہ نکالی جاسکیں۔
خیبرپختونخوا میں بارش اوربرفباری سے سردی بڑھ گئی، پنجاب کے بیشتر شہروں میں جل تھل ایک ہوگیا، سکھر سمیت بالائی سندھ میں باران رحمت برس پڑی، بلوچستان کے کئی شہروں میں کہیں ہلکی کہیں تیز بارش ہوئی۔
خیبر پختونخوا میں آئندہ 24 گھنٹوں کے دوران مزید بارش کا امکان
محکمہ موسمیات کے مطابق پشاور سمیت خیبر پختونخوا میں آئندہ 24 گھنٹوں کے دوران مزید بارش کا امکان ہے۔
پشاور، نوشہرہ، مردان، چارسدہ، صوابی، دیر، چترال، شانگلہ، بونیر، مالاکنڈ، ایبٹ آباد، ہری پور، مانسہرہ، بٹگرام، کوہستان، تورغر، مہمند، باجوڑ، کوہاٹ، ہنگو، کرک، لکی مروت، بنوں، کرم، ڈی آئی خان، ٹانک، شمالی و جنوبی وزیر ستان میں بارش کا امکان ہے۔
گزشتہ روز صوبے کے بیشتر اضلاع مین بارش ہوئی، کاکول اور پٹن میں 32، بالاکوٹ میں 28 ، دیر اور مالم جبہ میں 19، سیدو شریف میں 12 اور پشاور میں 6 ملی میٹر بارش ریکارڈ ہوئی جبکہ چترال میں 2 اور کالام میں 1 انچ برف باری ہوئی۔
پشاور کا کم سے کم درجہ حرارت 10 ڈگری سینٹی گریڈ ریکارڈ کیا گیا، شہر کا زیادہ سے زیادہ درجہ حرارت 19 ڈگری سینٹی گریڈ تک جانے کا امکان ہے جبکہ سب سے کم درجہ حرارت پارا چنار میں منفی 3 ، کالام ، دورش ، مالم جبہ اور چترال میں صفر ریکارڈ ہوا ہے۔
خیبر پختونخوا میں بارشوں سے ہونے والی جانی و مالی نقصانات کی رپورٹ
ادھر خیبر پختونخوا میں بارشوں سے ہونے والی جانی و مالی نقصانات کی رپورٹ جاری کردی گئی۔
پی ڈی ایم اے کی رپورٹ کے مطابق گذشتہ 48 گھنٹوں کے دوران صوبے کے مختلف اضلاع میں بارشوں سے مکانات کی چھتیں گرنے اور دیگر حادثات میں 2 افراد جاں بحق اور 7 زخمی ہوئے، زخمیون میں 4 بچے اور 3 خواتین شامل ہیں۔
بارشوں سے 10 گھروں کو نقصان پہنچا جبکہ 3 گھر مکمل تباہ اور 7 کو جزوی نقصان پہنچا، حادثات ہری پور، بٹگرام، باجوڑ ، لوئر اور اپر کوہستان، دیر، ہنگو، خیبر اور تورغر میں پیش آئے۔
پی ڈی ایم نے متاثرہ خاندانوں کو فوری طور پر امداد اور زخمیوں کو پہترین طبی سہولیات فراہم کرنے کی ہدایات جاری کردیں، بارش اور برف باری کے باعث بند شاہرائیں کھولنے کے لیے اقدامات کرنے کی بھی ہدایات جاری کردی گئیں۔
ترجمان پی ڈی ایم اے کے مطابق پی ڈی ایم اے، تمام ضلعی انتظامیہ، متعلقہ اور امدادی اداروں کے ساتھ مسلسل رابطے میں ہے، پی ڈی ایم اے کا ایمرجنسی آپریشن سینٹر مکمل فعال ہے، کسی بھی ناخوشگوار واقعہ کی اطلاع ہیلپ لائن 1700 پر دیں۔
