وفاقی حکومت نے آئندہ مالی سال 27-2026 کے بجٹ اور رواں مالی سال کے اقتصادی جائزے کی حتمی تاریخوں کا اعلان کر دیا ہے۔
وفاقی وزیر خزانہ محمد اورنگزیب کے مطابق ملکی معیشت کی سالانہ کارکردگی پر مبنی ’اقتصادی جائزہ 26-2025 جمعرات 11 جون کو پیش کیا جائے گا، جبکہ وفاقی بجٹ 12 جون کو قومی اسمبلی کے سامنے رکھا جائے گا۔ سینیٹ اور پارلیمانی رہنماؤں کے اہم اجلاسوں میں بجٹ کی منظوری کا شیڈول اور عوامی ریلیف اقدامات کی تفصیلات بھی سامنے آگئی ہیں۔
معاشی کارکردگی کا آئینہ
سینیٹ کے اجلاس سے خطاب کرتے ہوئے وزیر خزانہ محمد اورنگزیب نے بتایا کہ کل بروز جمعرات دوپہر 2 بج کر 20 منٹ پر جاری ہونے والا معاشی جائزہ ملکی معیشت کی سالانہ کارکردگی کا جامع خاکہ پیش کرے گا۔
اس اہم ترین دستاویز میں مجموعی قومی پیداوار (جی ڈی پی) ، محصولات، مختلف اقتصادی شعبوں کی کارکردگی اور دیگر اہم مالیاتی و معاشی اشاریوں کی تفصیلات شامل ہوں گی۔ وزیر خزانہ کے مشیر خرم شہزاد نے بھی اس شیڈول کی تصدیق کی ہے۔
بجٹ تاریخوں میں تبدیلی کیوں ہوئی؟
میڈیا رپورٹس کے مطابق حکومت نے بجٹ کے شیڈول میں متعدد تبدیلیاں کیں۔ پہلے یہ بجٹ 5 جون کو پیش ہونا تھا، تاہم اتحادی جماعتوں سے طویل مشاورت، مجوزہ مالیاتی اقدامات پر تحفظات اور اہم معاشی فیصلوں پر اتفاقِ رائے پیدا کرنے کے باعث اس میں ایک ہفتے کی تاخیر کی گئی۔
پیٹرول کی قیمتیں اور مشرقِ وسطیٰ کا بحران
سینیٹ میں پیٹرولیم مصنوعات کی قیمتوں میں اضافے پر گرما گرم بحث ہوئی۔ اپوزیشن سینیٹر محسن عزیز نے دعویٰ کیا کہ ’پیٹرول کی قیمتوں میں 200 فیصد تک اضافہ ہو چکا ہے، جس نے غریب عوام پر شدید مالی بوجھ ڈال دیا ہے‘۔
وزیر خزانہ نے اس پر وضاحتی جواب دیتے ہوئے کہا کہ ’مشرقِ وسطیٰ میں جاری تنازع کے آغاز پر اس کی مدت کا اندازہ لگانا مشکل تھا، لیکن یہ بحران اب ساڑھے 3 ماہ سے جاری ہے اور اس کے معاشی اثرات پاکستان پر بھی مرتب ہو رہے ہیں‘۔ انہوں نے کہا کہ اگر یہ تنازع فوری ختم بھی ہو جائے، تب بھی اس کے اثرات اگلے مالی سال تک رہیں گے۔
کسانوں اور موٹر سائیکل سواروں کے لیے اربوں روپے کی سبسڈی
محمد اورنگزیب نے ایوان کو بتایا کہ حکومت نے پٹرولیم مصنوعات کا پورا بوجھ عوام پر ڈالنے کے بجائے 3 ہفتوں کے دوران 129 ارب روپے کی بھاری سبسڈی فراہم کی۔
اس سبسڈی کے لیے سرکاری ترقیاتی پروگرام میں کٹوتیاں کی گئیں، جس میں سے اب تک 5.4 ارب روپے جاری ہو چکے ہیں۔ اس فنڈ سے 8 لاکھ موٹر سائیکل صارفین کو مالی امداد دی جا رہی ہے جبکہ کسانوں کے لیے 4 ارب روپے سے زیادہ کی معاونت مختص کی گئی ہے۔
13 کھرب روپے کا تاریخی ٹیکس ہدف
وزیر خزانہ نے واشگاف الفاظ میں کہا کہ حکومت نے رواں مالی سال کے لیے 13 کھرب روپے محصولات جمع کرنے کا بھاری ہدف مقرر کیا ہے۔
انہوں نے ملکی خود داری کا ذکر کرتے ہوئے کہا کہ ‘2022 کے تباہ کن سیلاب کے برعکس، پاکستان نے حالیہ شدید مالی دباؤ کے باوجود بین الاقوامی امداد کی اپیل نہیں کی، بلکہ اپنے ہی وسائل سے نقصانات کا ازالہ کرنے کی کوشش کی ہے’۔ انہوں نے مزید واضح کیا کہ پیٹرولیم لیوی کوئی نیا ٹیکس نہیں بلکہ یہ ملکی مالیاتی فریم ورک کا مستقل حصہ ہے۔
بجٹ عاشورہ سے قبل منظوری کا پلان
دوسری جانب قومی اسمبلی کے اسپیکر ایاز صادق کی زیر صدارت پارلیمانی رہنماؤں کا اہم اجلاس منعقد ہوا جس میں بجٹ سیشن کے انتظامات کا جائزہ لیا گیا۔
میڈیا رپورٹس کے مطابق 12 جون سے شروع ہونے والا یہ اہم ترین اجلاس بجٹ کی منظوری تک بغیر کسی ہفتہ وار تعطیل کے جاری رہے گا، یعنی ہفتہ اور اتوار کو بھی اجلاس منعقد ہوں گے۔
حکومت کی بھرپور کوشش ہے کہ بجٹ کی منظوری عاشورہ (محرم الحرام) سے قبل، یعنی 23 یا 24 جون تک مکمل کر لی جائے، بصورتِ دیگر یہ سیشن عاشورہ کی چھٹیوں کے علاوہ مسلسل جاری رہے گا۔
