اگر آپ اسمارٹ فون پر گوگل میپس استعمال کرتے ہیں تو اب ایک نیا اور دلچسپ فیچر آپ کے تجربے کو مزید بہتر بنا سکتا ہے، جس کے ذریعے آپ اپنے اردگرد کے علاقوں کو ماضی کی شکل میں بھی دیکھ سکیں گے۔
گوگل نے اسٹریٹ ویو کی 15 ویں سالگرہ کے موقع پر اس سروس کے ایک نمایاں فیچر کو اب موبائل صارفین کے لیے بھی متعارف کرا دیا ہے۔ کمپنی کے مطابق گزشتہ برسوں میں لی گئی اسٹریٹ ویو تصاویر کو اب گوگل میپس کی اینڈرائیڈ اور آئی او ایس ایپس کا حصہ بنایا جا رہا ہے۔
اس سے قبل یہ سہولت زیادہ تر ڈیسک ٹاپ کمپیوٹرز اور لیپ ٹاپس تک محدود تھی، تاہم اسمارٹ فون کے بڑھتے ہوئے استعمال کو دیکھتے ہوئے اسے اب موبائل پلیٹ فارمز پر بھی دستیاب کر دیا گیا ہے۔
اس نئے فیچر کو استعمال کرنے کے لیے صارفین کو اسٹریٹ ویو امیج پر کلک کرکے ’’See more dates‘‘ کا آپشن منتخب کرنا ہوگا، جس کے بعد وہ یہ دیکھ سکیں گے کہ ان کا علاقہ یا دیگر مقامات گزشتہ 10 سال میں مختلف ادوار میں کیسے دکھائی دیتے تھے، تاہم اس کا انحصار تصاویر کی دستیابی پر ہوگا۔
گوگل کے اس فیچر کے ذریعے صارفین نہ صرف اپنے شہر بلکہ مختلف مقامات کی ماضی کی جھلک بھی دیکھ سکیں گے، جسے ایک دلچسپ اور معلوماتی تجربہ قرار دیا جا رہا ہے۔
