ماہرین کا کہنا ہے کہ چیٹ جی پی ٹی اور دیگر اے آئی ٹولز کا حد سے زیادہ استعمال انسانی دماغ کی مختلف صلاحیتوں پر اثر ڈال سکتا ہے جن میں تخلیقی سوچ، توجہ، یادداشت اور تنقیدی سوچ شامل ہیں۔
حالیہ تحقیقی رپورٹس میں یہ خدشہ ظاہر کیا گیا ہے کہ جب انسان زیادہ تر ذہنی کام مصنوعی ذہانت کے حوالے کر دیتا ہے تو دماغ وہ ذہنی مشقت نہیں کرتا جو سوچنے کی صلاحیت کو مضبوط بناتی ہے۔
ماہرین کے مطابق یہ عمل وقت کے ساتھ ذہنی صلاحیتوں میں کمی کا باعث بن سکتا ہے۔
جارج ٹاؤن یونیورسٹی کے نیورو سائنس کے پروفیسر ایڈم گرین کے مطابق اگر انسان خود سوچنے کے عمل میں حصہ نہ لے تو اس کی یہ صلاحیت آہستہ آہستہ کمزور ہو سکتی ہے۔
ان کا کہنا ہے کہ اے آئی ایسا ٹول ہے جو ذہنی محنت کو کم کر دیتا ہے جس کے نتیجے میں اصل سوچنے کا عمل متاثر ہو سکتا ہے۔
دوسری جانب بعض ماہرین کا کہنا ہے کہ اے آئی ہمیشہ نقصان دہ نہیں ہوتا، بلکہ درست استعمال کی صورت میں یہ ذہنی دباؤ کم کر کے انسان کو زیادہ اہم کاموں پر توجہ دینے کا موقع بھی دیتا ہے۔
تحقیقی مطالعات میں یہ بھی دیکھا گیا ہے کہ جی پی ایس اور سرچ انجنز کے استعمال سے بھی انسانی یادداشت اور سمت شناسی کی صلاحیت میں کمی آئی ہے کیونکہ لوگ معلومات کو یاد رکھنے کے بجائے ٹیکنالوجی پر انحصار کرنے لگتے ہیں۔
ماہرین خبردار کرتے ہیں کہ اے آئی کے ساتھ بھی یہی صورتحال پیدا ہو سکتی ہے کیونکہ یہ ذہنی محنت کو آسان بنا دیتا ہے۔ بعض مطالعات کے مطابق زیادہ اے آئی استعمال کرنے والے افراد تنقیدی سوچ کے ٹیسٹ میں کمزور کارکردگی دکھاتے ہیں جسے بعض محققین ’کوجنیٹو سرینڈر‘ یعنی ذہنی طور پر ہتھیار ڈال دینا قرار دیتے ہیں۔
ماہرین کا مشورہ ہے کہ اے آئی کو مکمل طور پر ذہنی متبادل بنانے کے بجائے ایک معاون ٹول کے طور پر استعمال کیا جائے۔ ان کے مطابق بہتر طریقہ یہ ہے کہ انسان پہلے خود سوچنے کی کوشش کرے پھر اے آئی سے اپنی سوچ کو چیلنج یا بہتر بنانے میں مدد لے۔
اسی طرح تحقیق میں یہ بھی کہا گیا ہے کہ سیکھنے کے عمل میں تھوڑی ’ذہنی مشقت‘ یا مشکل ضروری ہے جیسے نوٹس لینا، خود سوال حل کرنا یا معلومات کو یاد رکھنے کی مشق کرنا۔
تخلیقی صلاحیتوں کے حوالے سے ماہرین کا کہنا ہے کہ اگر تمام آئیڈیاز اے آئی سے لیے جائیں تو انسان کی اپنی اصل تخلیقی صلاحیت متاثر ہو سکتی ہے کیونکہ دماغ نئے اور غیر متوقع خیالات خود پیدا کرنے کی مشق کھو دیتا ہے۔
ماہرین مجموعی طور پر اس بات پر متفق ہیں کہ اے آئی ایک طاقتور ٹیکنالوجی ہے لیکن اس کا دانشمندانہ استعمال ہی انسانی ذہن کو تیز اور فعال رکھ سکتا ہے۔
