امریکی صدر ڈونلڈ ٹرمپ نے کہا ہے کہ 3 امریکی جنگی بحری جہاز آبنائے ہرمز سے کامیابی کے ساتھ گزر گئے، حالانکہ ان پر حملے بھی کیے گئے۔
سوشل میڈیا ٹروتھ پر جاری بیان کے مطابق ایرانی جانب سے حملے میں میزائل، بغیر پائلٹ طیارے اور چھوٹی کشتیاں استعمال کی گئیں، تاہم امریکی جہاز محفوظ رہے۔
انہوں نے دعویٰ کیا کہ حملہ کرنے والی کشتیاں تباہ کر دی گئیں اور کئی سمندر برد ہو گئیں۔ داغے گئے میزائل راستے ہی میں ناکام بنا دیے گئے جبکہ بغیر پائلٹ طیاروں کو فضا میں ہی تباہ کر دیا گیا۔
ٹرمپ نے ایران پر سخت تنقید کرتے ہوئے کہا کہ ایران ایک غیر معمولی ملک ہے جبکہ اس کی قیادت انتہا پسندوں کے ہاتھ میں ہے۔ انہوں نے خبردار کیا کہ اگر ایران نے جلد معاہدہ نہ کیا تو آئندہ اس کے خلاف مزید سخت کارروائی کی جائے گی۔
ٹرمپ کے مطابق یہ تینوں جنگی جہاز اب دوبارہ امریکی بحری ناکہ بندی میں شامل ہوں گے، جسے انہوں نے فولادی دیوار قرار دیا۔
