بھارت نے امریکی صدر ڈونلڈ ٹرمپ کی جانب سے شیئر کیے گئے ان تبصروں کو مسترد کر دیا ہے جن میں بھارت سمیت چند ممالک کو جہنم نما جگہ کہا گیا تھا۔
بھارتی وزارتِ خارجہ نے ان بیانات پر سخت ردعمل ظاہر کرتے ہوئے کہا کہ یہ ریمارکس نامناسب اور دونوں ممالک کے مضبوط تعلقات کے منافی ہیں۔
متنازع تبصرے قدامت پسند مبصر مائیکل سیویج نے اپنے ریڈیو ٹاک شو کے ایک پروگرام میں کیے تھے، جس کا متن صدر ٹرمپ نے جمعرات کو اپنے ٹروتھ سوشل اکاؤنٹ پر بغیر کسی تبصرے کے شیئر کردیا تھا۔
ٹرانسکرپٹ کے مطابق سیویج نے کہا تھا کہ یہاں کوئی بچہ پیدا ہو جائے تو وہ فوراً شہری بن جاتا ہے۔ ‘۔۔۔پھر وہ چین، بھارت یا دنیا کے کسی اور جہنم نما مقام سے اپنے پورے خاندان کو یہاں لے آتے ‘ہیں۔
انہوں نے مزید کہا کہ آج آنے والے تارکینِ وطن میں اس ملک کے ساتھ وفاداری تقریباً نہ ہونے کے برابر ہے، جبکہ ماضی میں ایسا نہیں تھا۔
‘وہ آج کے یورپی نژاد امریکیوں اور ان کے آباؤ اجداد جیسے نہیں ہیں۔’
صدرٹرمپ پہلے ہی امریکا میں پیدائشی شہریت کو محدود کرنے کے لیے ایک ہدایت جاری کر چکے ہیں، جسے امریکی سپریم کورٹ میں چیلنج کیا گیا ہے۔
رواں ماہ کے آغاز میں وہ اس معاملے کی سماعت کے دوران عدالت بھی گئے تھے، جو ایک تاریخی دورہ تھا۔
بھارتی وزارتِ خارجہ نے جمعرات کی رات ان بیانات پر سخت ردعمل ظاہر کیا۔
ترجمان رندھیر جیسوال نے ایک بیان میں کہا کہ یہ ریمارکس واضح طور پر غیر سوچا سمجھا، نامناسب اور بے ذوقی پر مبنی ہیں۔
‘یہ ہرگز بھارت اور امریکا کے تعلقات کی حقیقت کی عکاسی نہیں کرتے، جو طویل عرصے سے باہمی احترام اور مشترکہ مفادات پر مبنی ہیں۔’
نئی دہلی میں امریکی سفارتخانے نے کہا کہ صدر یہ کہہ چکے ہیں کہ بھارت ایک عظیم ملک ہے اور وہاں ایک بہت اچھا دوست میری نظر میں قیادت کر رہا ہے۔
چین کی وزارتِ خارجہ نے اس معاملے پر فوری طور پر کوئی ردعمل نہیں دیا۔
بھارت کی بڑی اپوزیشن جماعت کانگریس پارٹی نے ‘جہنم نما جگہ’ کے تبصرے کو ‘انتہائی توہین آمیزاور بھارت مخالف’ قرار دیتے ہوئے کہا کہ یہ ہر بھارتی کے جذبات کو ٹھیس پہنچاتا ہے۔
پارٹی نے سوشل میڈیا پلیٹ فارم ایکس پر کہا کہ وزیراعظم نریندر مودی کو چاہیے کہ وہ امریکی صدر سے یہ معاملہ اٹھائیں اور سخت احتجاج ریکارڈ کرائیں۔
بھارتی سرکاری اعداد و شمار کے مطابق تقریباً 55 لاکھ بھارتی نژاد افراد امریکا میں مقیم ہیں، بھارتی اور چینی نژاد امریکی، امریکا میں ایشیائی نژاد افراد کے 2 سب سے بڑے گروہ ہیں۔
