پاکستان کی سفارتی کوششوں کے نتیجے میں ایران اور امریکا کے درمیان مذاکرات کی بحالی کے امکانات ایک بار پھر روشن ہو گئے ہیں۔ ایران کے وزیر خارجہ عباس عراقچی مختصر وفد کے ہمراہ جمعے کی شب اسلام آباد پہنچ گئے جبکہ وائٹ ہاؤس نے تصدیق کردی ہے کہ امریکی ایلچی اسٹیو وٹکوف اور جیرڈ کشنر پاکستان پہنچیں گے۔
ایرانی وزیر خارجہ عباس عراقچی امریکا سے مذاکرات کے سلسلے میں پاکستان و دیگر اسٹیک ہولڈرز سے مشاورت کے لیے اسلام آباد پہنچ گئے۔
پاکستان کے وزارت خارجہ کے مطابق ایرانی وزیر خارجہ کا استقبال نائب وزیراعظم و وزیر خارجہ سینیٹر اسحاق ڈار، چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر سمیت دیگر اعلیٰ حکام نے کیا، اس موقع پر سیکیورٹی کے سخت اقدامات کیے گئے تھے۔
دورے کے دوران ایرانی وزیر خارجہ پاکستان کی اعلیٰ قیادت سے ملاقاتیں کریں گے جن میں خطے کی تازہ صورتحال اور علاقائی امن و استحکام کے لیےجاری کوششوں پر تبادلہ خیال کیا جائے گا۔
دریں اژنا وزیر خارجہ اسحاق ڈار نے ایرانی وفد کو پاکستان کی جانب سے خوش آدید کہا ہے۔ اپنے ایکس اکاؤنٹ پر پیغام میں انہوں نے کہا کہ ہم خطے میں امن اور استحکام کے فروغ کے لیے بامقصد ملاقاتوں کے منتظر ہیں۔
