پنجاب حکومت نے ڈیجیٹل معیشت کو فروغ دینے اور نوجوانوں کو عالمی معیار کی مہارتوں سے آراستہ کرنے کے لیے چیف منسٹر آئی ٹی انٹرن شپ پروگرام کے دوسرے مرحلے کا آغاز کر دیا ہے، جس کے تحت آئی ٹی گریجویٹس کو نجی شعبے کی معروف کمپنیوں میں عملی تربیت کے ساتھ ماہانہ وظیفہ بھی دیا جائے گا۔
پنجاب حکومت نے چیف منسٹر آئی ٹی انٹرن شپ پروگرام کے دوسرے مرحلے کے لیے رجسٹریشن کا آغاز کر دیا ہے، جس کے تحت نوجوان آئی ٹی گریجویٹس کو معروف ٹیکنالوجی کمپنیوں میں عملی تجربہ حاصل کرنے کے مواقع فراہم کیے جائیں گے۔ اس اقدام کا مقصد صوبے میں ایسی ڈیجیٹل افرادی قوت تیار کرنا ہے جو عالمی مارکیٹ کی ضروریات سے ہم آہنگ ہو۔
پنجاب انفارمیشن ٹیکنالوجی بورڈ (پی آئی ٹی بی) کے تحت شروع کیے گئے اس پروگرام میں منتخب امیدواروں کو پانچ ماہ کے لیے نجی شعبے کی آئی ٹی کمپنیوں میں تعینات کیا جائے گا، جہاں انہیں جدید ٹولز، ورک فلو اور پراجیکٹ ماحول میں کام کرنے کا عملی تجربہ حاصل ہوگا۔
پروگرام کے شرکا کو دورانِ انٹرن شپ ماہانہ 50 ہزار روپے وظیفہ دیا جائے گا، جس کا مقصد نہ صرف ان کی مہارتوں میں اضافہ کرنا ہے بلکہ کیریئر کے ابتدائی مرحلے میں مالی دباؤ کو بھی کم کرنا ہے۔
حکام کے مطابق اس پروگرام کا بنیادی ہدف تعلیمی نظام اور صنعت کی ضروریات کے درمیان موجود خلا کو پُر کرنا ہے، خاص طور پر ایسے وقت میں جب ملک کا آئی ٹی شعبہ اور فری لانسنگ مارکیٹ تیزی سے ترقی کر رہے ہیں۔ اس اقدام سے ایسے گریجویٹس تیار کرنے کی کوشش کی جا رہی ہے جو براہ راست ملازمت کے قابل ہوں یا خودمختار ڈیجیٹل کام (فری لانسنگ) شروع کر سکیں۔
اہلیت کے لیے ضروری ہے کہ امیدوار نے گزشتہ چار برس کے دوران انفارمیشن ٹیکنالوجی، کمپیوٹر سائنس یا متعلقہ شعبے میں ڈگری مکمل کی ہو، اس کے پاس قومی شناختی کارڈ اور پنجاب کا ڈومیسائل بھی ہونا چاہیے۔ حکام نے واضح کیا ہے کہ وظیفہ کارکردگی اور تصدیق شدہ ڈگری جمع کرانے سے مشروط ہوگا، جبکہ زیرِ تعلیم یا غیر متعلقہ شعبوں سے تعلق رکھنے والے افراد اس پروگرام کے لیے اہل نہیں ہوں گے۔
چیئرمین پی آئی ٹی بی فیصل یوسف کے مطابق یہ پروگرام تعلیمی نظام کو مارکیٹ کی ضروریات سے ہم آہنگ کرنے اور صوبے کی ڈیجیٹل معیشت کو مضبوط بنانے کی حکمت عملی کا حصہ ہے۔ انہوں نے کہا کہ صنعت میں عملی تربیت نوجوانوں کی ملازمت کے امکانات بڑھانے کے ساتھ انہیں مقامی اور بین الاقوامی ڈیجیٹل مارکیٹس میں مقابلے کے قابل بنائے گی۔
یہ اقدام ایسے وقت میں سامنے آیا ہے جب پاکستان میں فری لانسنگ کا شعبہ تیزی سے وسعت اختیار کر رہا ہے اور نوجوانوں کے لیے روزگار اور زرِ مبادلہ کا ایک اہم ذریعہ بنتا جا رہا ہے۔ اسٹیٹ بینک کے حالیہ اعداد و شمار کے مطابق مالی سال 2025-26 کے پہلے نو ماہ میں فری لانسرز نے تقریباً 856 ملین ڈالر کا زرِ مبادلہ کمایا، جو ڈیجیٹل خدمات کی برآمدات میں اضافے کی عکاسی کرتا ہے۔
ماہرین کے اندازوں کے مطابق ملک میں دو ملین سے زائد فری لانسرز سافٹ ویئر ڈویلپمنٹ، ڈیزائن، مواد سازی اور ڈیجیٹل مارکیٹنگ کے شعبوں میں عالمی کلائنٹس کے ساتھ کام کر رہے ہیں۔ محدود روایتی ملازمتوں کے تناظر میں یہ شعبہ نوجوانوں کے لیے روزگار کا ایک اہم ذریعہ بن چکا ہے۔
فری لانسنگ پاکستان کی مجموعی ڈیجیٹل تبدیلی سے بھی جڑی ہوئی ہے، جہاں ریموٹ ورک پلیٹ فارمز نے ہزاروں نوجوانوں کو دفتر سے باہر رہتے ہوئے بین الاقوامی سطح پر آمدنی کمانے کے قابل بنایا ہے۔
تاہم ماہرین کے مطابق اس شعبے کو اب بھی بجلی کی قلت، انٹرنیٹ کی غیر مستحکم صورتحال اور ادائیگی کے نظام میں مشکلات جیسے مسائل کا سامنا ہے، جو پیداواری صلاحیت کو متاثر کرتے ہیں۔
ان رکاوٹوں کے باوجود فری لانسنگ کے بڑھتے ہوئے رجحان نے اس امید کو تقویت دی ہے کہ پاکستان کی آئی ٹی افرادی قوت عالمی ڈیجیٹل خدمات کی منڈی میں مزید مؤثر کردار ادا کر سکتی ہے۔
