وزیراعظم پاکستان شہباز شریف نے ایران جنگ بندی میں توسیع پر امریکی صدر ڈونلڈ ٹرمپ کا شکریہ ادا کیا ہے۔
سماجی رابطے کی سائٹ ایکس پر اپنے بیان میں انہوں نے لکھا کہ میں اپنی اور فیلڈ مارشل سید عاصم منیر کی طرف سے صدر ٹرمپ کا دل سے شکریہ ادا کرتا ہوں کہ انہوں نے ہماری درخواست پر احسن انداز میں جنگ بندی میں توسیع کو قبول کیا تاکہ جاری سفارتی کوششیں اپنے طریقے سے آگے بڑھ سکیں۔
انہوں نے کہاکہ دیے گئے اعتماد اور بھروسے کے تحت پاکستان بات چیت کے ذریعے تنازع کے حل کے لیے اپنی مخلصانہ کوششیں جاری رکھے گا۔
شہباز شریف نے کہاکہ میں پُرامید ہوں کہ دونوں فریق جنگ بندی کی پاسداری جاری رکھیں گے اور اسلام آباد میں ہونے والے دوسرے دورِ مذاکرات میں ایک جامع امن معاہدہ طے کرنے میں کامیاب ہوں گے، تاکہ تنازع کا مستقل خاتمہ ممکن بنایا جا سکے۔
وزیراعظم شہباز شریف نے اپنی پوسٹ کو امریکی صدر ڈونلڈ ٹرمپ، جے ڈی وینس، مارکو روبیو، اسٹیو وٹکوف سمیت ایرانی قیادت کو بھی ٹیگ کیا ہے۔
واضح رہے کہ قبل ازیں صدر ٹرمپ نے اعلان کیا ہے کہ انہوں نے وزیراعظم پاکستان شہباز شریف اور فیلڈ مارشل سید عاصم منیر کی درخواست پر ایران جنگ بندی میں توسیع کردی ہے۔
