نیشنل ڈیٹا بیس اینڈ رجسٹریشن اتھارٹی (نادرا) نے سعودی عرب میں رہنے والے پاکستانی شہریوں کے لیے ایک اہم اطلاع جاری کی ہے
نادرا کے ترجمان کے مطابق جدہ میں قائم پاکستانی قونصلیٹ جنرل کی ہدایات کے تحت حج سیزن 2026 کے دوران مدینہ منورہ میں قائم نادرا آفس کی سروسز 12 اپریل 2026 سے عارضی طور پر بند کر دی گئی ہیں، جو حج آپریشن مکمل ہونے کے بعد دوبارہ شروع کی جائیں گی۔اتھارٹی نے بتایا کہ اس دوران متبادل سہولت کے طور پر جدہ میں موجود نادرا رجسٹریشن سینٹر میں عملے کی تعداد بڑھا دی گئی ہے تاکہ شہریوں کو زیادہ سے زیادہ سہولت فراہم کی جا سکے۔مزید برآں، نادرا کا کہنا ہے کہ پاکستانی شہری کسی بھی رہنمائی یا معلومات کے لیے پاکستانی قونصلیٹ جنرل سے رجوع کر سکتے ہیں، جبکہ اس عرصے میں پاک آئی ڈی موبائل ایپ کے ذریعے بھی متعدد خدمات حاصل کی جا سکتی ہیں۔
