امن کیلئے پاکستان کی ثالثی کوششیں عروج پر پہنچ گئیں، فیلڈ مارشل سید عاصم منیر ایران پہنچ گئے۔
آئی ایس پی آر کے مطابق تہران پہنچنے پر ایرانی وزیرخارجہ عباس عراقچی نے فیلڈ مارشل سید عاصم منیر کا استقبال کیا۔
پاک فوج کے شعبہ تعلقات عامہ کے مطابق فیلڈ مارشل کا دورہ مصحالتی کوششوں کا حصہ ہے، وزیر داخلہ محسن نقوی بھی فیلڈمارشل کے ہمراہ ہیں۔
فیلڈ مارشل سید عاصم منیر کی وزیر خارجہ عباس عراقچی سے ملاقات ہوئی، وزیرداخلہ محسن نقوی بھی موجود تھے، ایرانی وزیر خارجہ نے کہا فیلڈ مارشل سید عاصم منیر کو تہران آمد پر خوش آمدید کہتے ہیں۔
انہوں نے کہا کہ مذاکرات کی میزبانی پاکستان اور ایران کے مضبوط تعلقات کا مظہر ہے، خطے میں امن و استحکام کیلئے ہمارا عزم پختہ ہے، عباس عراقچی نے تہران آمد پر وفد کا پرتپاک استقبال کیا، فیلڈ مارشل کا دورہ مصالحتی کوششوں کا حصہ ہے۔
عرب میڈیا کے مطابق پاکستان کا ایک اعلیٰ سطح کا وفد ایران پہنچا، جہاں وہ امریکا اور ایران کے درمیان مذاکرات کی بحالی سے متعلق اہم گفتگو کرے گا۔
الجزیرہ نیوز کے مطابق ایرانی ذرائع کا کہنا ہے کہ یہ دورہ ایسے وقت میں ہو رہا ہے جب دونوں ممالک کے درمیان مذاکرات دوبارہ شروع کرنے کی کوششیں جاری ہیں۔
واضح رہے کہ اس سے قبل ایرانی وزارت خارجہ کے ترجمان اسماعیل بقائی نے بتایا تھا کہ پاکستان کے ذریعے امریکا کے ساتھ پیغامات کا تبادلہ ہو رہا ہے اور اسی سلسلے میں ایران آج پاکستانی وفد کی میزبانی کر رہا ہے۔
ایرانی میڈیا کا کہنا ہے کہ مذاکرات کا دوسرا دور آئندہ چند دنوں میں پاکستان کے دارالحکومت اسلام آباد میں متوقع ہے۔
