پاکستان اور عالمی مالیاتی فنڈ (آئی ایم ایف) کے درمیان اسٹاف لیول معاہدہ طے پا گیا ہے۔
آئی ایم ایف کے اعلامیے کے مطابق حتمی منظوری کے بعد پاکستان کو توسیعی فنڈ سہولت کے تحت ایک ارب ڈالر جبکہ ریزیلینس اینڈ سسٹین ایبلٹی فیسلٹی (آر ایس ایف) کے تحت قریباً 21 کروڑ ڈالر ملیں گے۔
ادارے کا مزید کہنا ہے کہ ان دونوں پروگرامز کے ذریعے پاکستان کو مجموعی طور پر قریباً 4.5 ارب ڈالر کی مالی معاونت دستیاب ہوگی۔
آئی ایم ایف کے مطابق حکومتِ پاکستان مالی خسارہ کم کرنے کے لیے پرعزم ہے، مہنگائی پر قابو پایا جا رہا ہے، ٹیکس کے نظام میں اصلاحات جاری ہیں اور معیشت بہتری کی طرف گامزن ہے۔
واضح رہے کہ اس سے قبل دسمبر 2025 میں آئی ایم ایف کی جانب سے پاکستان کو 1.2 ارب ڈالر کی قسط جاری کی گئی تھی۔
سال 2024 میں آئی ایم ایف نے پاکستان کے لیے 7 ارب ڈالر کے بیل آؤٹ پروگرام کی منظوری دی تھی۔
