مائیکروسافٹ نے مائیکروسوفٹ ونڈوز 11 کے صارفین کے لیے ایک ہنگامی اپڈیٹ جاری کر دیا ہے۔
رپورٹس کے مطابق صارفین نے حالیہ سیکیورٹی اپڈیٹ کے بعد اہم ایپس میں مسائل کی شکایات کی تھیں۔
مارچ کے لازمی اپڈیٹ کے بعد انٹرنیٹ کنیکٹیویٹی سے متعلق بڑے مسائل سامنے آئے جن سے مائیکروسافٹ ٹیمز، مائیکروسافٹ آؤٹ لک، مائیکروسافٹ ون ڈرائیو اور مائیکروسافٹ آفس جیسی سروسز متاثر ہوئیں۔
یہ مسئلہ ایپس کو کھولنے سے نہیں روکتا لیکن ان کے آن لائن فیچرز جیسے ڈیٹا سنک ہونا، کلاؤڈ تک رسائی اور کمیونیکیشن ٹولز متاثر ہوتے ہیں۔
اس مسئلے کے حل کے لیے جاری کردہ اپڈیٹ ’2026-03 اپڈیٹ (KB5085516) (26200.8039)‘ کے نام سے دستیاب ہے تاہم یہ خودکار طور پر ڈاؤن لوڈ نہیں ہو رہا۔ اس لیے جن صارفین کو مسئلہ درپیش ہے انہیں یہ اپڈیٹ انسٹال کرنا ہوگا۔
مائیکروسافٹ کے مطابق یہ اپڈیٹ صرف ان صارفین کے لیے ضروری ہے جو اس مسئلے سے متاثر ہیں اور اس میں پچھلے سیکیورٹی اور دیگر اپڈیٹس کے ساتھ ایک اضافی فکس بھی شامل ہے۔
رپورٹس میں یہ بھی کہا گیا ہے کہ یہ بگ مائیکروسافٹ کی متعدد سروسز کو متاثر کر سکتا ہے جن میں مائیکروسافٹ ورڈ، مائیکروسافٹ ایکسل، مائیکروسافٹ پاورپوائنٹ اور مائیکروسافٹ کوپائلٹ شامل ہیں۔
مزید یہ کہ یہ خرابی مائیکروسافٹ اسٹور اور فیڈبیک ہب سمیت تقریباً تمام مائیکروسافٹ ایپس کو متاثر کر سکتی ہے۔
