عجمان, چائے شائے ریسٹورنٹ اینڈ کیفے عجمان کی آنر نور الصباح کی جانب سے پاکستانی کمیونٹی کے اعزاز میں ایک شاندار، پروقار اور پرتکلف سحور کا اہتمام کیا گیا، جس میں سیاسی، سماجی اور کاروباری شخصیات کے ساتھ ساتھ صحافیوں کی بڑی تعداد نے شرکت کی۔ تقریب نہایت خوشگوار، باوقار اور دوستانہ ماحول میں منعقد ہوئی جہاں مہمانوں کی تواضع بہترین انداز میں کی گئی۔ سحور کے دوران شرکاء نے باہمی روابط کو فروغ دینے،
کمیونٹی کے مسائل اور باہمی تعاون کے فروغ پر تفصیلی تبادلہ خیال کیا۔ تقریب میں موجود معزز مہمانوں نے اس بات پر زور دیا کہ اس قسم کی تقریبات نہ صرف پاکستانی کمیونٹی کو ایک پلیٹ فارم پر اکٹھا کرتی ہیں بلکہ بھائی چارے، اتحاد اور ہم آہنگی کو بھی مضبوط بناتی ہیں۔اس موقع پر شرکاء نے نور الصباح کی جانب سے اس احسن اقدام کو بھرپور سراہا اور ان کی کاوشوں کو قابلِ تحسین قرار دیا۔ مہمانوں کا کہنا تھا کہ اوورسیز پاکستانی کمیونٹی کے لیے ایسے اجتماعات انتہائی اہمیت کے حامل ہوتے ہیں، جو نہ صرف سماجی روابط کو مضبوط بناتے ہیں بلکہ مثبت سرگرمیوں کے فروغ میں بھی کلیدی کردار ادا کرتے ہیں۔ تقریب کے اختتام پر شرکاء نے نور الصباح کے لیے نیک تمناؤں کا اظہار کرتے ہوئے ان کی کامیابیوں اور مزید ترقی کے لیے دعا کی
