ایران کے صدر مسعود پزیشکیان نے کہا ہے کہ ایران خطے کے کسی ملک کو نشانہ بنانے کا ارادہ نہیں رکھتا۔
مسعود پزیشکیان نے کہا کہ ایران کا خطے کے کسی بھی ملک کو نشانہ بنانے کا ہرگز کوئی ارادہ نہیں اور ایران صرف اپنے دفاع تک محدود رہ کر حالات کو قابو میں رکھنے کی کوشش کر رہا ہے۔
ایرانی صدر نے کہا کہ ایران خطے کے دیگر ممالک کے ساتھ امن قائم رکھنا چاہتا ہے اور کشیدگی کے خاتمے کے لیے سنجیدہ اقدامات ضروری ہیں۔
خبر رساں ادارے رائٹرزکے مطابق ایرانی صدر مسعود پزشکیان نے شہباز شریف سے ٹیلی فونک رابطہ کیا جس میں خطے کی صورتحال اور امن و استحکام پر تبادلہ خیال کیا گیا۔
ایرانی صدر کا کہنا تھا کہ اگر عالمی برادری نے جنگ کے ذمہ داروں کی نشاندہی اور احتساب پر توجہ نہ دی تو عالمی نظام اور سلامتی خطرے میں پڑ سکتی ہے۔
مسعود پزیشکیان نے زور دیا کہ جنگ کو روکنے اور عالمی امن برقرار رکھنے کے لیے بین الاقوامی برادری کو اس مسئلے پر سنجیدگی سے کام کرنا چاہیے۔
