دنیا بھر میں جاری عالمی تنازعات اور سیکیورٹی خدشات کے درمیان مشہور بلغاریہ کی پیشگو بابا وانگا کی ایک قدیم پیشگوئی ایک بار پھر سوشل میڈیا اور آن لائن پلیٹ فارمز پر وائرل ہو گئی ہے۔
تفصیلات کے مطابق اس پیشگوئی کو خاص طور پر تیسری عالمی جنگ کے امکان کے تناظر میں شیئر کیا جا رہا ہے، جس نے صارفین اور ماہرین میں بحث کو جنم دیا ہے۔
بابا وانگا کے ماننے والوں کے مطابق انہوں نے پیشگوئی کی تھی کہ 2026 کے ابتدائی مہینوں میں ایک بڑی جنگ مشرقی علاقوں سے شروع ہوگی۔
سوشل میڈیا صارفین موجودہ امریکہ اور اسرائیل کے ایران پر حملے کے بعد اس پیشگوئی میں دلچسپی لے رہے ہیں۔ آن لائن پلیٹ فارمز پر کئی صارفین موجودہ حالات کو بابا وانگا کی پیشگوئی سے جوڑ کر دیکھ رہے ہیں۔
تاہم ماہرین اور تجزیہ کاروں کا کہنا ہے کہ بابا وانگا کی پیشگوئیاں مستند دستاویزات پر مبنی نہیں بلکہ مختلف انٹرویوز اور ثانوی ذرائع سے اخذ کی گئی ہیں۔
پیشگوئی میں کسی خاص وقت، مقام یا سیاسی حالات کا ذکر موجود نہیں، جس کی وجہ سے اسے ہر عالمی بحران کے تناظر میں مختلف انداز میں پیش کیا جاتا ہے۔
سیکورٹی تجزیہ کاروں کا یہ بھی کہنا ہے کہ موجودہ عالمی کشیدگی اور جنگ کے خطرات کا جائزہ حقیقی سیکیورٹی ڈیٹا، سیاسی فیصلوں اور سفارتی مذاکرات کی بنیاد پر لیا جاتا ہے، جبکہ بابا وانگا جیسے متنازع پیشگوئیوں کو حقیقت کے طور پر نہیں دیکھا جا سکتا۔
