پاکستان کی مسلح افواج نے ’آپریشن غضب للحق‘ کے دوران افغانستان میں سرگرم طالبان اور دیگر دہشتگردوں پر کارروائی کرتے ہوئے انہیں بھاری نقصان پہنچایا ہے۔ فضائی اور زمینی کارروائی میں افغان طالبان کے 297 جنگجو ہلاک، 450 سے زائد زخمی، 89 چیک پوسٹس تباہ، 18 اہم پوسٹس قبضے میں، اور 135 ٹینک و مسلح گاڑیاں تباہ ہو چکی ہیں۔ افغانستان کے 29 مختلف مقامات کو مؤثر فضائی کارروائی کا نشانہ بنایا گیا۔
وفاقی وزیر اطلاعات عطا تارڑ نے ٹویٹر پر اس آپریشن کے نتائج کا خلاصہ دیتے ہوئے بتایا کہ پاکستان کی فورسز کی فوری اور مؤثر کارروائی نے افغان طالبان کو بھاری نقصان پہنچایا ہے اور پاکستان کی جانی و مالی تحفظ کی یقینی اقدامات کو عملی شکل دی۔
انہوں نے کہا کہ یہ کارروائی جارحیت کے جواب میں کی گئی اور ملک کی سیکیورٹی کے لیے انتہائی ضروری تھی۔
وزیراعظم کے ترجمان برائے غیرملکی میڈیا شرف زیدی نے بھی اس حوالے سے تفصیل شیئر کرتے ہوئے کہا کہ کارروائی کے دوران نہ صرف افغان طالبان بلکہ ٹی ٹی پی اور دیگر دہشتگردوں کو بھی بھاری نقصان پہنچایا گیا ہے۔
