متحدہ عرب امارات کی معروف تحقیقی جامعہ ’خلیفہ یونیورسٹی نے پاکستانی طلبہ کے لیے ‘ مکمل فنڈڈ اسکالرشپس کی تفصیلات جاری کر دی ہیں۔ یونیورسٹی کے مطابق یہ وظائف ماسٹرز اور پی ایچ ڈی پروگرامز کے لیے دستیاب ہیں اور میرٹ کی بنیاد پر دیے جائیں گے۔
واضح رہے کہ یونیورسٹی مختلف ٹائرز (جیسے Tier I، Tier II، Tier III) میں اسکالرشپس پیش کرتی ہے، جن میں اعلیٰ ٹائرز میں مکمل فنڈنگ ملتی ہے۔
اسکالرشپ کے تحت منتخب طلبہ کی ٹیوشن فیس مکمل یا جزوی طور پر (75% سے 100%) معاف کی جاتی ہے۔ دیگر فوائد میں ماہانہ وظیفہ، طبی انشورنس، ٹیکسٹ بکس، بین الاقوامی کانفرنسز کی سپورٹ، ویزا اور فلائٹس (بین الاقوامی طلبہ کے لیے)، اور بعض ٹائرز میں یونیورسٹی رہائش شامل ہے۔
طلبہ کو جدید لیبارٹریز، ریسرچ سینٹرز اور عالمی معیار کی سہولیات تک رسائی ملے گی، جو انجینئرنگ، کمپیوٹر سائنس، مصنوعی ذہانت (AI)، توانائی، خلائی سائنس اور دیگر جدید شعبوں میں تحقیق کے لیے بہترین ماحول فراہم کرتی ہیں۔
اہلیت کا معیار
اہلیت کے معیار میں مضبوط تعلیمی ریکارڈ لازمی ہے۔ ماسٹرز کے لیے متعلقہ بیچلر ڈگری (کم از کم CGPA 3.0/4.0)، جبکہ پی ایچ ڈی کے لیے ماسٹرز ڈگری (CGPA 3.25/4.0) یا ڈائریکٹ پی ایچ ڈی کے لیے بیچلر ڈگری (CGPA 3.5/4.0 + GRE) درکار ہے۔ انگریزی زبان میں مہارت بھی ضروری ہے، جس کے لیے آئلٹس یا ٹوفل اسکور طلب کیا جا سکتا ہے۔ کچھ تحقیقی پروگرامز کے لیے ’جی آر ای‘ اسکور بھی مانگا جا سکتا ہے۔
درخواست دینے کا طریقہ کار
امیدوار خلیفہ یونیورسٹی کی آفیشل ویب سائٹ (https://pgapply.ku.ac.ae) پر جا کر آن لائن اپلائی کر سکتے ہیں۔ پہلے اکاؤنٹ بنانا ہوتا ہے، پھر مطلوبہ پروگرام منتخب کر کے درخواست فارم مکمل کیا جاتا ہے۔ تمام دستاویزات آن لائن اپ لوڈ کرنا ضروری ہیں۔ شارٹ لسٹ ہونے والے امیدواروں کو انٹرویو کے لیے بلایا جاتا ہے۔
واضح رہے کہ فال 2026 کے لیے آخری تاریخ 2 مارچ 2026 ہے۔
درکار دستاویزات
تعلیمی اسناد اور ٹرانسکرپٹس، پاسپورٹ کاپی، اپ ڈیٹڈ سی وی، اسٹیٹمنٹ آف پرپز، پی ایچ ڈی کے لیے ریسرچ اسٹیٹمنٹ، 2 سفارشی خطوط، انگریزی ٹیسٹ اسکور، GRE (اگر درکار ہو)، پاسپورٹ سائز تصویر، اور غیر UAE ڈگریوں کے لیے UAE وزارتِ تعلیم سے Equivalency سرٹیفکیٹ وغیرہ شامل ہیں۔
ماہانہ وظیفہ کتنا ہوگا؟
ماہانہ وظیفہ ٹائر اور پروگرام پر منحصر ہے۔
پی ایچ ڈی کے لیے: بنیادی 20,000 AED ماہانہ (تمام ٹائرز میں)۔ Tier I میں اضافی 20,000 AED (کل 40,000 AED تک)، Tier II میں اضافی 10,000 AED (کل 30,000 AED تک)، جبکہ Tier III میں 20,000 AED۔ یہ Research/Teaching Path (کام کے ساتھ) کے لیے ہے۔
ماسٹرز کے لیے: وظیفہ محدود ہے (جیسے Tier I میں 4,000 AED ماہانہ) یا صرف ٹیوشن معافی، انشورنس اور رہائش فراہم کی جاتی ہے۔ ماسٹرز طلبہ ٹیچنگ/ریسرچ ڈیوٹیز کے ذریعے اضافی کمائی بھی کر سکتے ہیں۔
واضح رہے کہ خلیفہ یونیورسٹی 2007 میں قائم کی گئی اور آج یہ یو اے ای کی صفِ اول کی تحقیقی جامعات میں شمار ہوتی ہے۔ جامعہ کا مرکزی کیمپس ابوظہبی میں واقع ہے، جہاں جدید لیبارٹریز، ریسرچ سینٹرز اور عالمی معیار کی فیکلٹی موجود ہے۔
یونیورسٹی خاص طور پر انجینئرنگ، سائنس، ٹیکنالوجی، مصنوعی ذہانت، خلائی سائنس اور توانائی کے شعبوں میں اپنی تحقیق اور جدت کی بدولت بین الاقوامی سطح پر پہچان رکھتی ہے۔ یہاں دنیا بھر سے طلبہ تعلیم حاصل کرتے ہیں، جس سے ایک متنوع اور بین الاقوامی تعلیمی ماحول قائم ہوتا ہے۔
زنیرہ رفیع
