پاکستان نے افغانستان میں سات مقامات پر دہشت گردوں کے ٹھکانوں کو تباہ کرنے کا دعویٰ کیا ہے۔ یہ کارروائیاں حالیہ دنوں میں پاکستان میں ہونے والے خودکش حملوں کے جواب میں کی گئی ہیں جن میں سیکیورٹی اداروں اور عام شہریوں کو نشانہ بنایا گیا تھا۔
ذرائع کا کہنا ہے کہ افغانستان کے صوبے ننگرہار میں چار اہداف کو ہدف بنایا گیا، جن میں خوارج کے دو اہم مراکز بھی شامل تھے۔
ان مراکز میں مبینہ طور پر’خارجی اسلام مرکز‘ اور ’خارجی ابراہیم مرکز‘ شامل ہیں، جنہیں مکمل طور پر تباہ کر دیا گیا۔
اسی طرح صوبہ پکتیکا میں دو مراکز کو نشانہ بنایا گیا، جن میں’خارجی ملا رہبر‘ اور ’خارجی مخلص یار‘ سے منسوب ٹھکانے شامل ہیں۔ سیکیورٹی ذرائع کے مطابق دونوں اہداف کو مؤثر کارروائی کے ذریعے تباہ کر دیا گیا ہے۔
صوبہ خوست میں بھی ایک مرکز کو ہدف بنایا گیا، جسے ’خارجی مولوی عباس مرکز‘ قرار دیا جاتا ہے۔ ذرائع کے مطابق کارروائی میں اس مرکز کو بھی تباہ کر دیا گیا ہے۔
سیکیورٹی ذرائع کے مطابق افغانستان میں دہشت گردوں کے خلاف کارروائیوں میں 80 سے زائد خوارج کی ہلاکت کی بھی اطلاعات ہیں۔
سیکیورٹی حکام کا کہنا ہے کہ کارروائی کا مقصد سرحد پار سے ہونے والی دہشتگردی کی کارروائیوں کا سدباب کرنا اور ملک کے اندر امن و امان کو یقینی بنانا تھا۔ مزید تفصیلات سامنے آنے کا امکان ہے۔
افغان میڈیا اور مقامی ذرائع کے مطابق افغانستان کے مختلف علاقوں میں فضائی حملوں کی اطلاعات سامنے آئی ہیں۔ رپورٹس میں بتایا گیا ہے کہ صوبہ پکتیکا کے ضلع برمل میں ایک زور دار دھماکا سنا گیا جس کے بارے میں دعویٰ کیا جا رہا ہے کہ یہ دہشت گردوں کے ایک مبینہ ٹھکانے کو نشانہ بنانے کے نتیجے میں ہوا۔
ذرائع کا کہنا ہے کہ جیٹ طیاروں نے ڈسٹرکٹ برمل میں فضائی کارروائی کی، جس کے بعد وہاں موجود مبینہ دہشت گردوں کے انفراسٹرکچر کو شدید نقصان پہنچا۔ تاہم آزاد ذرائع سے ان دعوؤں کی تصدیق نہیں ہو سکی اور نہ ہی ہلاک یا زخمی ہونے والوں کی حتمی تعداد سامنے آ سکی ہے۔
