آئی سی سی مینز ٹی20 ورلڈ کپ میں آج پاکستان اور نمیبیا کے درمیان گروپ مرحلے کا انتہائی اہم مقابلہ کھیلا جائے گا، جس میں سپر ایٹ مرحلے تک رسائی کا فیصلہ ہوگا۔ پاکستان کے لیے اس میچ کا ہدف واضح طور پر ہار سے بچنا ہے۔
پاکستان اگر یہ میچ جیت لیتا ہے تو سپر ایٹ میں جگہ پکی کرلے گا، جبکہ بارش کے باعث میچ منسوخ ہونے کی صورت میں بھی ایک پوائنٹ ملنے سے قومی ٹیم اگلے مرحلے میں پہنچ جائے گی۔ تاہم اگر نمیبیا نے اپ سیٹ کردیا تو پاکستان کو لگاتار تیسری مرتبہ کسی مردانہ آئی سی سی ایونٹ کے پہلے راؤنڈ سے باہر ہونا پڑے گا۔
بھارت سے شکست کے بعد دباؤ
پاکستان کو گزشتہ میچ میں روایتی حریف کے ہاتھوں بھاری شکست کا سامنا کرنا پڑا، جس سے ٹیم کا اعتماد متاثر ہوا ہے۔ باؤلنگ میں یک رخی حکمت عملی اور بیٹنگ لائن اپ کی ناکامی نمایاں رہی۔ ابتدائی اوورز میں وکٹیں گرنے سے میچ کا پانسہ پلٹ گیا تھا۔
ذرائع کے مطابق ٹیم میں متعدد تبدیلیوں کا امکان ہے۔ فاسٹ باؤلرز نسیم شاہ اور سلمان مرزا کی واپسی متوقع ہے، جبکہ بیٹنگ میں بھی رد و بدل کیا جا سکتا ہے۔ کپتان سلمان آغا کو امید ہے کہ سینئر کھلاڑی دباؤ کا مقابلہ کرتے ہوئے بھرپور کم بیک کریں گے۔
نمیبیا بے خوف، پاکستان پر دباؤ
نمیبیا گروپ اے میں اب تک کوئی میچ نہیں جیت سکی، تاہم پہلے ہی ایونٹ سے باہر ہونے کے باعث وہ بغیر دباؤ میدان میں اترے گی۔ ان کی بیٹنگ لائن اپ کا انحصار اوپنرز پر ہے، خاص طور پر لورین اسٹین کیمپ نے پاور پلے میں جارحانہ بیٹنگ سے توجہ حاصل کی ہے۔ اگر انہوں نے لمبی اننگز کھیلی تو پاکستان کے لیے مشکلات بڑھ سکتی ہیں۔
بارش کا امکان، کیا ہوگا؟
کولمبو میں میچ کے آغاز کے وقت ہلکی بارش کی پیشگوئی ہے، تاہم بعد میں موسم صاف ہونے کا امکان ظاہر کیا گیا ہے۔ اگر بارش کے باعث میچ مکمل نہ ہو سکا اور منسوخ ہو گیا تو دونوں ٹیموں کو ایک، ایک پوائنٹ ملے گا، جو پاکستان کو سپر ایٹ میں پہنچانے کے لیے کافی ہوگا۔
