بنگلا دیش میں ہونے والے الیکشن میں بنگلا دیش نیشنلسٹ پارٹی نے 209 نشستیں حاصل کرلیں،جماعت اسلامی 68 نشستوں کےساتھ دوسرے نمبر پر رہی ، آزاد امیدوار7 ،نیشنل سٹیزنز پارٹی 6 نشستوں پر کامیاب ہوئی جبکہ 17دیگرامیدواروں نے بھی میدان مار لیا۔
بنگلا دیشی میڈیا کے مطابق ووٹرٹرن آؤٹ 61فیصد رہا،الیکشن میں 2ہزار 28امیدواراور50جماعتیں میدان میں تھیں جبکہ کل299نشستیں تھیں۔
دوسری جانب الیکشن کمشنربنگلا دیش ابو الفضل محمد ثنا اللہ کا کہنا تھا کہ شفاف اور غیر جانبدارانہ انتخابات کا انعقاد عزم تھا، انتخابی عمل کو شفاف بنانے کیلئے تمام تر کوششیں بروئے کار لائیں۔
بنگلا دیشی میڈیا کے مطابق الیکشن کمیشن نے 3حلقوں میں نتائج کے اعلان کو مؤخر کردیا،حلقوں میں شہرپور2، چٹاگانگ2 اور چٹاگانگ 4 شامل ہیں۔
غیر سرکاری نتائج کے مطابق الیکشن میں 7 خواتین امیدوار بھی کامیاب ہوئیں ،بی این پی پارٹی کی6 خواتین امیدوار اپنے اپنے حلقوں سے کامیاب ہوئیں۔بنگلا دیش نیشنلسٹ پارٹی کا کہنا ہے کہ انہیں انتخابات میں اکثریت مل گئی ہے،اگلی حکومت بنائیں گے۔ادھر بنگلا دیش کے انتخابات میں کامیابی پرصدرمملکت نے بی این پی کے سربراہ کومبارکباد پیش کی ہے۔
صدرآصف زرداری نے پرامن انتخابات پربنگلا دیش کے عوام کومبارکباد دیتے ہوئے بنگلا دیش کے ساتھ جمہوری شراکت داری کی مضبوط حمایت کااعادہ کیا۔
وزیراعظم شہبازشریف نے بھی سربراہ بی این پی کوکامیابی پرمبارکباد پیش کی ،انہوں نے پُرامن الیکشن کے انعقاد پربنگلا دیشی عوام کوبھی مبارکباد دی۔
وزیراعظم نے بنگلا دیش کی نئی قیادت کے ساتھ مل کر کام کرنے اور تعلقات مضبوط بنانے کا عزم کیا ، انہوں نے کہا کہ بنگلا دیش کے ساتھ برادرانہ اور کثیر جہتی دوطرفہ تعلقات کو وسعت دی جائے گی۔
بنگلا دیش کے ساتھ امن، استحکام اور ترقی کے اہداف حاصل کرنےکیلئے کام کریں گے ،نئی قیادت کے ساتھ دوطرفہ تعاون کے نئے دور کا آغاز کرنے کیلئے تیار ہیں۔
ڈھاکا میں امریکی سفارتخانے نے بھی بنگلا دیش الیکشن میں کامیابی پربی این پی کوکامیابی پرمبارکباد دی ہے،امریکی سفارتخانے نے پُرامن الیکشن کے انعقاد پربنگلا دیشی عوام کوبھی مبارکباد پیش کی ۔
چین نے بھی بنگلا دیش نیشنلسٹ پارٹی کو الیکشن میں کامیابی پر مبارکباد پیش کی ہے ، چینی سفارتخانے کا کہنا ہے کہ انتخابات کے پرامن اور کامیاب انعقاد پر بنگلا دیش کی عوام مبارکباد کی مستحق ہے۔
انتخاب میں آگے رہنے پر بنگلا دیش نیشنلسٹ پارٹی کو مبارکباد پیش کرتے ہیں،ہم بنگلا دیش کی نئی حکومت کے ساتھ تعاون کے منتظر ہیں،چین اوربنگلا دیش تعلقات میں نئے باب رقم کرنے کے خواہاں ہیں۔
