اسرائیل نے غزہ بورڈ آف پیس میں باضابطہ طور پر شمولیت اختیار کرلی ہے۔ اسرائیلی وزیرِ اعظم بنیامین نیتن یاہو نے دورۂ واشنگٹن کے دوران امریکی وزیرِ خارجہ مارکو روبیو سے اہم ملاقات کی، جس میں دوطرفہ تعلقات، مشرقِ وسطیٰ کی صورتِ حال اور غزہ سے متعلق مجوزہ امن فریم ورک پر تفصیلی تبادلۂ خیال کیا گیا۔
ملاقات کے اختتام پر وزیرِ اعظم نیتن یاہو نے غزہ بورڈ آف پیس سے متعلق دستاویز پر دستخط کیے، جس کے بعد اسرائیل کی اس فورم میں شمولیت باضابطہ طور پر مؤثر ہوگئی۔
نیتن یاہو نے سماجی رابطے کی ویب سائٹ ایکس پر اپنے بیان میں کہا کہ اگرچہ مذاکرات میں غزہ سمیت متعدد امور زیرِ بحث آئیں گے، تاہم گفتگو کا محور ”سب سے بڑھ کر“ ایران کے ساتھ جاری مذاکرات ہوں گے۔
واضح رہے کہ غزہ بورڈ آف پیس کے ابتدائی چارٹر پر دستخط کی تقریب جنوری کے آخر میں سوئٹزرلینڈ کے شہر ڈاووس میں منعقد ہوئی تھی، جس میں 17 ممالک کے رہنماؤں نے شرکت کی تھی۔ تقریب میں لاطینی امریکا، یورپ، مشرقِ وسطیٰ، وسطی اور جنوب مشرقی ایشیائی ممالک کے صدور اور اعلیٰ حکومتی عہدیداران شریک ہوئے تھے۔
