گوگل نے خبردار کیا ہے کہ دنیا بھر میں استعمال ہونے والے تقریباً 40 فیصد اینڈرائیڈ فونز نئے سائبر حملوں کے خطرے سے دوچار ہیں۔
کمپنی کے مطابق اینڈرائیڈ کے پرانے ورژنز استعمال کرنے والے ڈیوائسز میل ویئر اور اسپائی ویئر کے خلاف مؤثر تحفظ حاصل نہیں کر پا رہے۔
گوگل نے تازہ اینڈرائیڈ سیکیورٹی اپ ڈیٹ جاری کرتے ہوئے بتایا کہ اینڈرائیڈ 12 اور اس سے پرانے ورژنز کے لیے اب اہم سیکیورٹی اپ ڈیٹس فراہم نہیں کی جا رہیں۔
اس کا مطلب یہ ہے کہ صرف وہی فون محفوظ تصور کیے جا سکتے ہیں جو اینڈرائیڈ 13 یا اس سے جدید ورژن پر چل رہے ہیں، اور ایسے ڈیوائسز کی شرح تقریباً 58 فیصد ہے، جبکہ باقی 40 فیصد سے زیادہ فونز سیکیورٹی سپورٹ سے باہر ہو چکے ہیں۔
کمپنی کی جاری کردہ تازہ رپورٹ کے مطابق دسمبر کے اعداد و شمار میں اینڈرائیڈ 16 صرف 7.5 فیصد فونز پر انسٹال تھا، جبکہ اینڈرائیڈ 15، 19.3 فیصد، اینڈرائیڈ 14، 17.9 فیصد، اور اینڈرائیڈ 13، 13.9 فیصد ڈیوائسز پر استعمال ہو رہا تھا۔ یہی چاروں ورژن اس وقت سیکیورٹی اپ ڈیٹس حاصل کر رہے ہیں۔
ماہرین کے مطابق ایک ارب سے زائد صارفین ایسے فون استعمال کر رہے ہیں جنہیں نئے سیکیورٹی پیچز دستیاب نہیں، جس کی وجہ سے وہ سائبر خطرات کا زیادہ شکار ہو سکتے ہیں۔
دوسری جانب ایپل کو بھی اپنے صارفین کو تازہ iOS 26 پر منتقل کرنے میں مشکلات پیش آ رہی ہیں، تاہم توقع ہے کہ آئندہ مہینوں میں زیادہ تر آئی فونز اپ ڈیٹ ہو جائیں گے، جبکہ مکمل طور پر سپورٹ سے باہر آئی فونز کی تعداد نسبتاً کم ہے۔
ماہرین کا مشورہ ہے کہ اگر کسی صارف کا اینڈرائیڈ فون اینڈرائیڈ 13 یا اس سے جدید ورژن پر اپ ڈیٹ نہیں ہو سکتا تو بہتر سیکیورٹی کے لیے نیا ڈیوائس لینے پر غور کرنا چاہیے۔
