بھارت کے شہر غازی آباد میں ایک افسوسناک واقعہ پیش آیا، جس میں تین کم عمر بہنیں اپنی رہائشی عمارت کی 9ویں منزل سے کود کر ہلاک ہو گئیں۔
پولیس کے مطابق یہ حادثہ اس وقت پیش آیا جب والدین نے ان کی آن لائن گیمنگ کی عادت پر اعتراض کیا۔ مرنے والی تین بہنوں کی شناخت پاکھی (12 سال)، پراچی (14 سال) اور وشیکا (16 سال) کے ناموں سے ہوئی۔
پولیس کے مطابق یہ تینوں بہنیں گیمنگ میں اتنی مصروف تھیں کہ اکثر پڑھائی سے غافل رہتی تھیں اور خاندان سے الگ تھلگ ہو گئی تھیں۔
واقعے کے بعد ان کے قریب سے ایک ڈائری اور 8 صفحات پر مشتمل خودکشی کا نوٹ ملا، جس میں انہوں نے اپنی گیمنگ کی عادت اور جذبات بیان کیے
نوٹ میں انہوں نے لکھا تھا کہ جو کچھ اس ڈائری میں لکھا ہے، سب پڑھ لو کیونکہ یہ سب سچ ہے۔ مجھے واقعی افسوس ہے، معافی، پاپا۔
پولیس کے مطابق حادثے کی اطلاع صبح تقریباً 2:15 بجے ملی، اور جب اہلکار موقع پر پہنچے تو تینوں بہنوں کو اسپتال لے جایا گیا جہاں ڈاکٹروں نے انہیں مردہ قرار دیا۔ تحقیقات جاری ہیں اور قانونی کارروائی بھی کی جا رہی ہے۔
پولیس نے بتایا کہ بہنوں نے کووڈ‑19 کے دوران آن لائن گیمنگ شروع کی تھی اور وہ خاص طور پر مشن یا ٹاسک بیسڈ گیمز میں مگن رہتی تھیں۔ اس کی وجہ سے وہ اکثر اسکول نہیں جاتیں اور زیادہ وقت کھیل میں گزارتی تھیں۔
