امریکی کمپنی ٹیسلا نے اپنی نئی الیکٹرک اسپورٹس کار روڈسٹر متعارف کرا دی ہے، جو نہ صرف غیر معمولی رفتار سے دوڑنے بلکہ ہوا میں اچھلنے، پلٹنے اور راکٹ جیسے تھرسٹرز کی مدد سے حرکت کرنے کی صلاحیت بھی رکھتی ہے۔
ایلون مسک کی خلائی کمپنی اسپیس ایکس کے اشتراک سے تیار کی گئی اس گاڑی کی نمائش نے دیکھنے والوں کو حیران کر دیا۔ کمپنی نے اس کی پروڈکشن شروع کرنے کے لیے 2028 کا ہدف دیا ہے۔ یہ وہی گاڑی ہے جس کا نیا ماڈل پہلی بار تقریباً ایک دہائی قبل پیش کیا گیا تھا، تاہم اس کی تیاری اور لانچنگ کے وعدوں میں کئی مرتبہ توسیع ہوئی۔
بالاخر جمعرات کو امریکی ریاست ٹیکساس میں اسپیس ایکس کے ٹیسٹنگ مقام پر ہونے والی تقریب میں سفید رنگ کی دو نشستوں والی روڈسٹر کو پیش کردیا گیا ہے۔
ٹیسٹنگ کے دوران گاڑی نے ایک ریمپ پر الٹی سمت میں حرکت کی، پھر ہوا میں پلٹی اور نصب شدہ تھرسٹرز کی مدد سے نیچے اتری۔ تقریب کے دوران گاڑی کو ایک ٹرک اور دوسری گاڑیوں کے اوپر سے چھلانگ لگاتے ہوئے بھی دکھایا گیا۔
تھرسٹرز ایسے آلات ہوتے ہیں جو گیس یا ہوا کو تیزی سے خارج کرکے کسی چیز کو دھکا دیتے ہیں اور اس کی حرکت یا سمت تبدیل کرنے میں مدد دیتے ہیں۔ اسپیس ایکس اپنے راکٹوں میں بھی اسی نوعیت کی ٹیکنالوجی استعمال کرتی ہے۔
تقریب کے دوران ایلون مسک نے کہا کہ روڈسٹر کی رفتار اور کارکردگی اسے عام الیکٹرک گاڑیوں سے الگ بناتی ہے۔
