گورنر خیبرپختونخوا فیصل کریم کنڈی نے سانحہ پشاور میں جاں بحق بچوں کے اہل خانہ کو فی کس 10،10 لاکھ روپے اور زخمیوں کو 2 لاکھ روپے امداد دینے کا اعلان کردیا ہے۔
جمعرات کو میڈیا سے گفتگو کرتے ہوئے گورنر خیبرپختونخوا فیصل کریم کنڈی نے اعلان کیا کہ پشاور میں اسکول چھت حادثے کے شہدا کے لواحقین کو فی کس 10،10 لاکھ روپے دیے جائیں گے جب کہ زخمیوں کو 2 لاکھ روپے امداد دی جائے گی۔
فیصل کریم کنڈی نے بتایا کہ نجی اسکول کی چھت گرنے کے واقعے کی تحقیقات کے لیے کمیٹیاں قائم کردی گئی ہیں جب کہ انکوائری رپورٹ 4 دن میں پیش کی جائے گی۔
انہوں نے کہا کہ واقعے کے ذمہ داروں اور اسکول کو این او سی جاری کرنے والوں کا تعین کیا جائے گا اور بچوں کی زندگیوں پر کوئی سمجھوتہ نہیں ہوگا۔
گورنر خیبرپختونخوا نے صوبے بھر کے سرکاری اسکولوں کی عمارتوں کا اسٹرکچرل آڈٹ کرانے کا عندیہ بھی دے دیا۔
ٹیچر اور 15 بچوں کی نماز جنازہ ادا
پشاور میں اسکول کی چھت گرنے کے واقعے میں جاں بحق اسکول ٹیچر اور 15 بچوں کی نماز جنازہ ادا دیر کالونی میں کردی گئی جب کہ نماز جنازہ میں گورنر خیبرپختونخوا فیصل کریم کنڈی سمیت سیاسی و عسکری حکام نے شرکت کی۔
