سعودی عرب نے بحیرہ احمر میں جہاز رانی کے تحفظ کیلئے بحری دفاعی اتحاد قائم کرلیا۔
برطانوی نشریاتی ادارے کے مطابق سعودی عرب نے کثیرالملکی بحری دفاعی اتحاد کے قیام کے منصوبے کا اعلان کیا جس کا مقصد بحیرہ احمر کے خطے میں بین الاقوامی جہاز رانی اور توانائی کی ترسیل کے راستوں کا تحفظ ہے۔
یہ اقدام یمن کے ایران نواز حوثیوں کے حملوں کے بعد سامنے آیا جنہوں نے دنیا کی مصروف ترین تجارتی گزرگاہوں میں سے ایک میں خلل پیدا کیا ہے۔
سعودی وزارت دفاع نے کہا کہ 43 ممالک اور یورپی یونین کے نمائندوں نے ایک بین الاقوامی اجلاس میں شرکت کی، جس میں مجوزہ اتحاد پر تبادلہ خیال کیا گیا۔
منصوبے کے تحت سعودی عرب اس اتحاد کا بانی اور سربراہ ملک ہو گا، جبکہ مرکزی دفتر بھی سعودی عرب میں قائم کیا جائے گا، یہ اتحاد بحری سلامتی کو مضبوط بنانے، جہاز رانی کی آزادی کے تحفظ، بین الاقوامی تجارتی راستوں اور توانائی کی ترسیل کی راہداریوں کو محفوظ بنانے اور باب المندب اور خلیج عدن میں مشترکہ بحری مفادات کے تحفظ میں مدد دے گا۔
سعودی عرب کی وزارت وزارت کے مطابق ترکیہ، پاکستان، مصر، سوڈان اور جبوتی سمیت 14 ممالک نے مشترکہ بیان جاری کرتے ہوئے مجوزہ اتحاد کی حمایت کی۔
خلیج کے 6 عرب ممالک میں سے عمان اور متحدہ عرب امارات ان ممالک کی فہرست میں شامل نہیں تھے جنہوں نے اس بیان کی حمایت کی۔
