ویڈیو اسٹریمنگ پلیٹ فارم نیٹ فلکس کے شیئرز میں کمپنی کی تیسری سہ ماہی کے لیے توقع سے کم مالی پیشگوئی اور ناظرین کے اعدادوشمار کی رپورٹنگ محدود کرنے کے اعلان کے بعد نمایاں کمی دیکھی گئی۔
غیر ملکی میڈیا کے مطابق نیٹ فلکس کے شیئرز بعد از اوقات کاروبار میں تقریباً 9 سے 11 فیصد تک گر کر 67.99 ڈالر تک آگئے، جس سے کمپنی کی مارکیٹ ویلیو میں بھی نمایاں کمی واقع ہوئی۔
کمپنی کی دوسری سہ ماہی کے مالی نتائج مجموعی طور پر توقعات کے مطابق رہے، تاہم سرمایہ کاروں نے تیسری سہ ماہی کے کمزور اندازوں اور ناظرین کے دیکھنے کے اوقات سے متعلق معلومات کم جاری کرنے کے فیصلے پر منفی ردعمل دیا۔
مالیاتی ادارے ایل ایس ای جی کے مطابق تجزیہ کاروں نے تیسری سہ ماہی کے لیے 13 ارب ڈالر آمدنی اور فی حصص 84 سینٹ منافع کی پیش گوئی کی تھی، جبکہ نیٹ فلکس نے جولائی سے ستمبر کے دوران 12.86 ارب ڈالر آمدنی اور فی حصص 82 سینٹ منافع کی توقع ظاہر کی ہے۔
تجزیہ کار پاؤلو پیسکاٹور کے مطابق کمپنی کی نئی پیش گوئی کاروبار میں اچانک کمزوری کی نشاندہی نہیں کرتی بلکہ انتظامیہ کے محتاط انداز اور ترقی کی رفتار کے بتدریج مستحکم ہونے کی عکاسی کرتی ہے۔
انہوں نے کہا کہ نیٹ فلکس اب تیز رفتار ترقی کے بجائے ایک مستحکم مرحلے میں داخل ہو رہا ہے، جہاں غلطی کی گنجائش پہلے سے کہیں کم ہوگی۔
نیٹ فلکس نے یہ بھی اعلان کیا ہے کہ وہ مستقبل میں ناظرین کے دیکھنے کے اوقات سے متعلق رپورٹیں کم وقفوں سے جاری کرے گا، کیونکہ کمپنی اشتہارات، براہ راست تقریبات اور ویڈیو گیمز جیسے نئے شعبوں کے ذریعے ترقی کے مواقع تلاش کر رہی ہے۔
رپورٹ کے مطابق رواں سال نیٹ فلکس کے شیئرز اپنی قدر کا تقریباً پانچواں حصہ کھو چکے ہیں، کیونکہ سرمایہ کار کمپنی کی مستقبل کی ترقی کی رفتار کے حوالے سے خدشات کا اظہار کر رہے ہیں۔
