امریکا نے رواں سال 85 پاکستانی طلبا اور محققین کو فل برائٹ اسکالرشپس فراہم کر دی ہیں، جن کے تحت وہ امریکی جامعات میں اعلیٰ تعلیم حاصل کریں گے۔ دوسری جانب امریکی حکومت نے غیر ملکی طلبا کے ویزوں میں توسیع کے قواعد سخت کرتے ہوئے نئی مدتِ قیام اور وفاقی منظوری کی شرط عائد کر دی ہے۔
امریکا نے 85 پاکستانی طلبا اور محققین کو فل برائٹ اسکالرشپس فراہم کر دی ہیں۔ یو ایس ایجوکیشنل فاؤنڈیشن اِن پاکستان (یو ایس ای ایف پی) کے مطابق اس سال 71 طلبا کو ماسٹرز، 14 کو پی ایچ ڈی جبکہ 6 افراد کو فل برائٹ فارن لینگویج ٹیچنگ اسسٹنٹ (ایف ایل ٹی اے) فیلوشپ دی گئی ہے۔
ان وظائف کے تحت پاکستانی طلبا مختلف امریکی جامعات میں ماسٹرز اور پی ایچ ڈی کی تعلیم حاصل کریں گے۔ فل برائٹ پروگرام امریکا اور پاکستان کی حکومتوں کے مشترکہ تعاون سے جاری ہے، جبکہ 2005 سے اب تک 3 ہزار سے زائد پاکستانی طلبا اس پروگرام کے ذریعے وظائف حاصل کر چکے ہیں۔
میڈیا رپورٹ کے مطابق امریکا میں زیر تعلیم غیر ملکی طلبا کے ویزوں میں توسیع کے لیے نئے اور سخت قواعد نافذ کر دیے گئے ہیں۔ امریکی محکمہ خارجہ کا کہنا ہے کہ محکمہ داخلی سلامتی نے حتمی ضابطہ جاری کرتے ہوئے ’مدتِ قیام‘ سے متعلق قانونی سقم ختم کر دیا ہے، جس کے تحت غیر ملکی طلبا، تبادلہ پروگرام کے شرکا اور بعض غیر ملکی صحافی بغیر مقررہ مدت کے امریکا میں قیام کر سکتے تھے۔
نئے ضابطے کے مطابق ایف (F)، جے (J) اور آئی (I) ویزا رکھنے والے افراد کے لیے امریکا میں قیام کی ایک مقررہ مدت ہوگی۔ ایف اور جے ویزا کی زیادہ سے زیادہ مدت 4 سال مقرر کی گئی ہے، جبکہ اس میں توسیع اب لازمی وفاقی منظوری سے مشروط ہوگی۔
محکمہ خارجہ کے مطابق ویزا میں توسیع کے خواہشمند درخواست گزاروں کو بائیومیٹرک تصدیق، پس منظر کی جانچ پڑتال اور ممکنہ دھوکہ دہی کی چھان بین کے مراحل سے بھی گزرنا ہوگا۔
مزید برآں ایف-1 ویزا رکھنے والے طلبا کے لیے تعلیم مکمل ہونے کے بعد امریکا چھوڑنے کی رعایتی مدت بھی 60 روز سے کم کر کے 30 روز کر دی گئی ہے۔
