پاکستان کے فری لانسرز نے مالی سال 26-2025 کے پہلے 11 ماہ کے دوران ملکی ڈیجیٹل معیشت میں اپنی اہمیت مزید بڑھاتے ہوئے آئی ٹی برآمدات میں ریکارڈ حصہ ڈالا ہے۔ پہلی مرتبہ فری لانسرز کی برآمدی آمدن ایک ارب ڈالر کی حد عبور کر گئی، جبکہ مجموعی آئی ٹی برآمدات میں ان کا حصہ بھی بڑھ کر 25 فیصد تک پہنچ گیا۔
فری لانسرز کی آمدن میں نمایاں اضافہ
اسٹیٹ بینک آف پاکستان (ایس بی پی) کے جاری کردہ اعداد و شمار کے مطابق جولائی سے مئی تک آئی ٹی اور متعلقہ شعبوں سے وابستہ فری لانسرز نے 1.06 ارب ڈالر سے زیادہ زرمبادلہ ملک میں لایا۔
گزشتہ مالی سال کے اسی عرصے میں یہ آمدن 708 ملین ڈالر تھی، اس طرح ایک سال کے دوران تقریباً 49.7 فیصد اضافہ ریکارڈ کیا گیا، جو اس شعبے کی تیز رفتار ترقی کی عکاسی کرتا ہے۔
رپورٹ کے مطابق رواں مالی سال کے دوران پاکستان کی مجموعی آئی ٹی برآمدات 4 ارب ڈالر تک پہنچ چکی ہیں۔ گزشتہ سال اسی عرصے میں مجموعی آئی ٹی برآمدات میں فری لانسرز کا حصہ 20.3 فیصد تھا، جو اب بڑھ کر 25 فیصد ہو گیا ہے۔
ترقی کی وجوہات کیا ہیں؟
صنعتی ماہرین کے مطابق نوجوانوں میں فری لانسنگ کے بڑھتے رجحان، عالمی سطح پر پاکستانی ڈیجیٹل خدمات کی بڑھتی ہوئی طلب اور حکومتی سہولتوں نے اس شعبے کی ترقی میں کلیدی کردار ادا کیا ہے۔
ان کا کہنا ہے کہ بہتر بینکاری نظام، آسان رپورٹنگ کے طریقہ کار اور غیر ملکی آمدن کے انتظام میں زیادہ سہولت نے بھی فری لانسرز کو باضابطہ مالیاتی ذرائع اختیار کرنے کی ترغیب دی ہے۔
چند برس میں 3 ارب ڈالر آمدن کا ہدف حاصل کیا جا سکتا ہے
پاکستان فری لانسرز ایسوسی ایشن کے چیئرمین ابراہیم امین نے اس کامیابی کو فری لانس کمیونٹی کے لیے تاریخی سنگ میل قرار دیتے ہوئے کہاکہ اگر حکومتی سطح پر سازگار پالیسیاں جاری رہیں تو پاکستانی فری لانسرز آئندہ چند برسوں میں سالانہ 3 ارب ڈالر تک زرمبادلہ کمانے کی صلاحیت رکھتے ہیں۔
انہوں نے فری لانسرز کے لیے 0.25 فیصد فائنل ٹیکس ریجیم برقرار رکھنے کے حکومتی فیصلے کا خیرمقدم کرتے ہوئے کہاکہ بین الاقوامی فری لانسنگ پلیٹ فارمز اور ادائیگی کی مختلف سروسز پہلے ہی ان کی آمدن کا 25 سے 30 فیصد مختلف فیسوں اور کمیشنز کی مد میں وصول کر لیتی ہیں۔
انٹرنیٹ اور بجلی کی فراہمی ناگزیر قرار
ماہرین کا کہنا ہے کہ شعبے کی پائیدار ترقی کے لیے تیز رفتار انٹرنیٹ اور بلا تعطل بجلی کی فراہمی انتہائی ضروری ہے۔ اندازوں کے مطابق پاکستان میں اس وقت تقریباً 30 لاکھ فری لانسرز کام کر رہے ہیں، جس کے باعث ملک دنیا کی بڑی فری لانس مارکیٹوں میں شمار ہوتا ہے۔
