امریکا اور ایران کے درمیان جنگ کے خاتمے اور آبنائے ہرمز میں بحری آمدورفت کی بحالی سے متعلق ابتدائی معاہدے کی خبروں کے بعد عالمی منڈی میں خام تیل کی قیمتیں مارچ کے بعد کم ترین سطح پر آگئیں۔
پیر کے روز برینٹ خام تیل کی قیمت 4.1 فیصد کمی کے بعد 83.75 ڈالر فی بیرل جبکہ امریکی ویسٹ ٹیکساس انٹرمیڈیٹ (WTI) 4.72 فیصد کمی کے ساتھ 80.87 ڈالر فی بیرل تک گر گیا۔ دونوں معاہدے جمعہ کے روز بھی 3 فیصد سے زائد کمی ریکارڈ کر چکے تھے۔
امریکی صدر ڈونلڈ ٹرمپ اور ایران کے نائب وزیر خارجہ کاظم غریب آبادی نے اس بات کی تصدیق کی ہے کہ دونوں ممالک جنگ کے خاتمے اور آبنائے ہرمز کو دوبارہ کھولنے کے لیے ایک ابتدائی مفاہمت تک پہنچ گئے ہیں۔
پاکستان، جو اس عمل میں ثالث کا کردار ادا کر رہا ہے، کے وزیراعظم محمد شہباز شریف کے مطابق امریکا اور ایران جمعہ کے روز سوئٹزرلینڈ میں مفاہمت کی یادداشت پر دستخط کریں گے۔
صدر ٹرمپ نے کہا ہے کہ آبنائے ہرمز کو ’ٹول فری‘ کھول دیا جائے گا جبکہ ایرانی بندرگاہوں پر امریکی بحری ناکہ بندی بھی ختم کر دی جائے گی۔ ایرانی خبر رساں ادارے مہر کے مطابق مجوزہ معاہدے کے تحت آبنائے ہرمز کو 30 روز کے اندر دوبارہ بحال کیا جائے گا۔
مارکیٹ تجزیہ کاروں کا کہنا ہے کہ جنگ کے باعث خام تیل کی قیمتوں میں شامل جغرافیائی خطرات کا اضافی عنصر تیزی سے ختم ہو رہا ہے کیونکہ سرمایہ کار تیل کی سپلائی بحال ہونے کی توقعات کو قیمتوں میں شامل کر رہے ہیں۔
یاد رہے کہ آبنائے ہرمز گزشتہ 3 ماہ سے زیادہ عرصے تک بند رہنے کے باعث عالمی منڈی روزانہ لاکھوں بیرل تیل اور گیس کی سپلائی سے محروم رہی۔ یہ آبی گزرگاہ دنیا کے قریباً 5ویں حصے کے تیل اور مائع قدرتی گیس (ایل این جی) کی ترسیل کے لیے انتہائی اہم سمجھی جاتی ہے۔
دوسری جانب برطانیہ، فرانس، جرمنی اور اٹلی پر مشتمل ای 4 ممالک نے اشارہ دیا ہے کہ ایران کے جوہری پروگرام سے متعلق پیشرفت کی صورت میں تہران پر عائد پابندیوں میں نرمی کی جا سکتی ہے۔
تجزیہ کاروں کے مطابق اگرچہ جنگ بندی اور مذاکرات سے تیل کی قیمتوں پر دباؤ کم ہوا ہے، تاہم آئندہ 60 روز کے دوران جوہری مذاکرات اور خطے کی مجموعی صورتحال سے متعلق غیر یقینی صورتحال کے باعث قیمتوں میں مزید بڑی کمی کے امکانات محدود دکھائی دیتے ہیں۔
