ٹیکنالوجی کی دنیا کی معروف کمپنی ایپل کے پہلے فولڈ ایبل آئی فون کے حوالے سے بڑی تفصیلات سامنے آ گئی ہیں، جس کے مطابق یہ نیا فلیگ شپ ہارڈ ویئر قیمت کے تمام پچھلے ریکارڈ توڑ دے گا۔
بلومبرگ کے نامور تجزیہ کار مارک گرومین کی حالیہ رپورٹ کے مطابق اس انقلابی آئی فون کی ابتدائی قیمت 2,000 امریکی ڈالرز ہونے کا امکان ہے جو موجودہ ماڈلز کے مقابلے میں لگ بھگ ایک ہزار ڈالرز مہنگا ہوگا۔
رپورٹ میں بتایا گیا ہے کہ اس ڈیوائس کو ستمبر 2026 میں آئی فون 18 پرو لائن اپ کے ساتھ مارکیٹ میں اتارا جا سکتا ہے، تاہم ہنج کے ڈیزائن کو حتمی شکل دینے میں درپیش بعض تکنیکی مسائل کے باعث اس کی لانچنگ دسمبر 2026 تک بھی مؤخر ہو سکتی ہے۔
ذرائع اور فزیکل پروٹو ٹائپس سے ملنے والی معلومات کے مطابق ایپل کا یہ پہلا فون کلیم شیل کے بجائے کتاب کی طرح کھلنے والے بک اسٹائل ڈیزائن پر مبنی ہوگا۔ بند حالت میں اس کی اسکرین کا سائز 5.5 انچ ہوگا، جبکہ اسے مکمل طور پر کھولنے پر یہ 7.8 انچ کی ایک بڑی اسکرین میں تبدیل ہو جائے گا جس کے لیے او ایل ای ڈی پینلز سام سنگ فراہم کرے گا۔
مکمل کھلنے پر اس فون کی موٹائی محض 4.5 ملی میٹر ہوگی جس کی وجہ سے اس میں فرنٹ پر ٹرو ڈیپتھ کیمرہ لگانا ممکن نہیں ہوگا، اسی لیے اس ماڈل میں روایتی فیس آئی ڈی کی جگہ پاور بٹن یا اسکرین میں ٹچ آئی ڈی یعنی فنگر پرنٹ سنسر کی واپسی کی جائے گی۔
دوسری جانب چینی سوشل میڈیا پلیٹ فارم ویبو اور دیگر ذرائع کے مطابق ایپل 2026 اور 2027 میں اپنی نئی ڈیوائسز کو 2 الگ الگ مراحل میں مارکیٹ میں متعارف کروائے گا۔ پہلے مرحلے میں ستمبر 2026 کے دوران آئی فون فولڈ کے ساتھ آئی فون 18 پرو اور پرو میکس پیش کیے جائیں گے، جن میں نیا اے 20 پروسیسر اور دباؤ کے احساس پر کام کرنے والا اپ گریڈڈ کیمرہ کنٹرول بٹن شامل ہوں گے۔
دوسرے مرحلے میں یعنی مارچ 2027 تک کمپنی اسٹینڈرڈ آئی فون 18 اور بجٹ فرینڈلی ماڈل آئی فون 18 ای متعارف کروائے گی، جہاں آئی فون 18 ای کی ابتدائی قیمت 599 ڈالرز تک رکھنے کے لیے اس کے بعض اجزاء اور چِپ کو ڈاؤن گریڈ کیے جانے کا امکان ہے۔
