کراچی ٹریفک پولیس نے اعلان کیا ہے کہ یکم جون سے شارع فیصل پر لین کی خلاف ورزی کرنے والی گاڑیوں کے خلاف ای چالان جاری کیے جائیں گے۔
ترجمان ٹریفک پولیس کے مطابق اس اقدام کا مقصد شارع فیصل پر ٹریفک کی روانی کو بہتر بنانا، نظم و ضبط قائم رکھنا اور حادثات کی روک تھام کو یقینی بنانا ہے۔
ترجمان نے شہریوں سے اپیل کی ہے کہ وہ ٹریفک قوانین کی پابندی کرتے ہوئے اپنی گاڑیاں مقررہ لین میں چلائیں تاکہ سڑکوں پر بہتر ٹریفک نظام برقرار رکھا جا سکے۔
انہوں نے واضح کیا کہ موٹر سائیکلوں، بسوں، کاروں اور دیگر تمام اقسام کی گاڑیوں کے لیے لین ڈسپلن پر عمل کرنا لازمی ہوگا۔
ترجمان نے کہا کہ خلاف ورزی کی صورت میں خودکار نگرانی کے نظام کے تحت کارروائی کرتے ہوئے ای چالان جاری کیا جائے گا۔
