متحدہ عرب امارات نے اوپیک اور اوپیک پلس سے علیحدگی کا اعلان کر دیا ہے، جس سے عالمی تیل مارکیٹ اور خلیجی سیاست میں بڑی تبدیلی متوقع ہے۔
متحدہ عرب امارات نے منگل کے روز اعلان کیا ہے کہ وہ تیل برآمد کرنے والے بڑے اتحاد اوپیک (OPEC) اور اوپیک پلس (OPEC+) سے علیحدگی اختیار کر رہا ہے۔ یہ فیصلہ ایسے وقت میں سامنے آیا ہے جب ایران کے ساتھ جاری کشیدگی اور جنگی صورتِ حال نے عالمی توانائی کی منڈی کو شدید متاثر کیا ہوا ہے اور عالمی معیشت غیر یقینی کا شکار ہے۔
یو اے ای کی سرکاری خبر رساں ایجنسی کے مطابق یہ فیصلہ ملک کی تیل پیداوار کی پالیسی، موجودہ اور مستقبل کی صلاحیتوں کا جائزہ لینے کے بعد کیا گیا ہے۔ بیان میں کہا گیا کہ یہ اقدام قومی مفاد اور عالمی منڈی کی ضروریات کو مؤثر انداز میں پورا کرنے کے عزم کے تحت اٹھایا گیا ہے۔
مزید کہا گیا کہ خلیج عرب اور آبنائے ہرمز میں حالیہ کشیدگی اور رکاوٹوں کے باعث تیل کی ترسیل متاثر ہو رہی ہے، تاہم طویل مدت میں عالمی توانائی کی طلب میں مسلسل اضافے کی توقع ہے۔ یو اے ای کا یہ فیصلہ یکم مئی سے نافذ العمل ہوگا۔
یو اے ای، جو طویل عرصے سے اوپیک کا اہم رکن رہا ہے، اس کے انخلا کو تنظیم کے لیے بڑا دھچکا قرار دیا جا رہا ہے۔ ماہرین کے مطابق اس سے اوپیک کے اندر اتحاد کمزور پڑ سکتا ہے، خاص طور پر ایسے وقت میں جب رکن ممالک کے درمیان پہلے ہی پیداوار اور سیاسی معاملات پر اختلافات موجود ہیں۔
یو اے ای کے وزیر توانائی سہیل المزروعی نے امریکی نشریاتی ادارے ’سی این این‘ کی اینکر بیکی اینڈرسن کو انٹرویو دیتے ہوئے کہا کہ موجودہ صورتِ حال میں تیل کی عالمی سپلائی پہلے ہی دباؤ کا شکار ہے، اس لیے اوپیک سے علیحدگی کے اثرات نسبتاً کم ہوں گے۔
وزیر توانائی نے کہا کہ اس فیصلے کا وقت درست ہے کیونکہ اس سے مارکیٹ اور قیمتوں پر کوئی بڑا جھٹکا نہیں پڑے گا۔ ان کے مطابق آبنائے ہرمز کی بندش اور محدود ٹریفک کے باعث تمام ممالک بشمول یو اے ای پہلے ہی پابندیوں اور رکاوٹوں کا سامنا کر رہے ہیں، اس لیے یہ اقدام تیل کی قیمتوں پر اضافی دباؤ نہیں ڈالے گا۔
