میسجنگ ایپ واٹس ایپ اپنے صارفین کے لیے ایک نیا اور مفید فیچر متعارف کرانے کی تیاری کر رہا ہے جس کے تحت وائس اور ویڈیو کالز کے دوران نوائس کینسلیشن کی سہولت فراہم کی جائے گی۔
یہ نیا فیچر کال کے دوران پس منظر کے غیر ضروری شور کو خودکار طور پر کم کرے گا جس سے آواز زیادہ صاف اور واضح سنائی دے گی۔
یہ خصوصیت خاص طور پر ٹریفک، ہجوم یا تیز ہوا جیسے شور والے ماحول میں کال کرنے والوں کے لیے فائدہ مند ہوگی۔
استعمال کا طریقہ کار
صارفین کو کال انٹرفیس میں ایک ٹوگل کے ذریعے اس فیچر کو آن یا آف کرنے کی سہولت دی جائے گی۔
ابتدائی طور پر یہ فیچر ڈیفالٹ کے طور پر فعال ہوگا تاہم صارف اپنی ضرورت کے مطابق اسے بند بھی کر سکے گا۔
آواز کی وضاحت کیسے بہتر ہوگی؟
دلچسپ بات یہ ہے کہ یہ فیچر آپ کو سامنے والے کی آواز زیادہ واضح سنانے کے بجائے آپ کی آواز کو دوسرے شخص تک صاف انداز میں پہنچانے میں مدد دے گا۔ یعنی اگر آپ نے یہ فیچر آن کیا ہوگا تو سامنے والا شخص آپ کی آواز بہتر طریقے سے سن سکے گا۔
یہ فیچر اس وقت اینڈرائیڈ کے تازہ بیٹا ورژن میں دیکھا گیا ہے تاہم ابھی یہ مکمل طور پر تیار نہیں اور بتدریج بیٹا صارفین کے لیے متعارف کرایا جا رہا ہے۔
