،وزیراعظم شہباز شریف نے کہا ہے کہ امریکی صدر ڈونلڈ ٹرمپ امن کے داعی ہیں پاکستان بھارت جنگ بندی میں صدر ٹرمپ اور ان کی ٹیم کا اہم کردار ہے۔
نیویارک میں میڈیا سے گفتگو کرتے ہوئے وزیراعظم شہبازشریف نے کہا کہ صدر ڈونلڈ ٹرمپ دنیا بھر میں امن قائم کرنا چاہتے ہیں، صدر ٹرمپ نے جنرل اسمبلی اجلاس سے خطاب میں بھی امن کے لیے کوششوں کا ذکر کیا۔
شہباز شریف نے کہا کہ پاکستان بھارت جنگ بندی میں صدر ٹرمپ اور ان کی ٹیم کا اہم کردار ہے، انہوں نے جنگ بند کرانے میں کلیدی کردار ادا کیا۔
قبل ازیں غزہ جنگ کے خاتمے کےلیے وزیراعظم شہبازشریف سمیت مسلم ممالک کے سربراہان نے امریکی صدر سے اہم ملاقات کی۔ ڈونلڈ ٹرمپ نے فوری جنگ بندی اور یرغمالیوں کی رہائی پر زور دیا۔
وزیراعظم شہباز شریف نےکہا امریکی صدر کا عزم ظاہر کرتا ہے کہ وہ امن کے علمبردار ہیں ۔ پاک بھارت جنگ روکنے میں بھی انہوں نے اہم کردار ادا کیا ۔۔ امیرقطر کا فوری سیزفائر اور قیدیوں کی رہائی پر زور دیا۔ ثالثی پر آمادگی کا بھی اظہارکیا۔ اجلاس سے قبل وزیراعظم شہبازشریف نے امیر قطر، اردن کے شاہ عبداللہ اور انڈونیشیا کے صدر سےملاقات کی جس میں غزہ کی صورتحال پر مشاورت کی گئی۔
اجلاس کےبعد امریکی صدر نے ملاقات کو مفید قرار دیتے ہوئے کہا اجلاس میں تمام بڑے کھلاڑی موجود تھے۔ آئندہ بیٹھک میں اسرائیل بھی شریک ہوگا۔ امید ہے جنگ بندی کےلئے راستہ نکالنےمیں کامیاب ہوجائیں گے۔
دوسری جانب وزیراعظم شہبازشریف کی امریکی صدر ڈونلڈ ٹرمپ سے ملاقات طے ہوگئی۔ ملاقات کل وائٹ ہاؤس میں ہوگی۔ ملاقات میں وزیراعظم کے ساتھ پاکستان کے اعلیٰ حکام بھی ہوں گے۔
اس سے قبل امریکی صدر ڈونلڈ ٹرمپ کی عرب اسلامی سربراہی اجلاس کے اختتام پر وزیرِاعظم شہباز شریف اور اسحاق ڈار سے ملاقات ہوئی،امریکی صدر اور وزیرِاعظم کے مابین خوشگوار ماحول میں غیر رسمی گفتگو ہوئی۔
