گرینڈ ہیلتھ الائنس کی جانب سے سرکاری ہسپتالوں کی نجکاری کے خلاف احتجاج گیارہویں روز بھی جاری رہی، جس کے باعث شہر کے بڑے سرکاری ہسپتالوں میں اوپی ڈی اور ان ڈور سروسز مکمل طور پر معطل ہیں۔
ہڑتال کے باعث ہسپتالوں میں سینئر ڈاکٹرز بھی اوپی ڈی میں خدمات انجام دینے نہیں پہنچ سکے جبکہ بیشتر شیڈول شدہ آپریشنز ملتوی کر دیے گئے۔ اس صورتحال سے سب سے زیادہ متاثر پریشان حال مریض ہوئے، جو شدید گرمی میں علاج کی امید لیے ہسپتالوں کے چکر لگاتے رہے۔
شہریوں کا کہنا ہے کہ حکومت اور احتجاجی ڈاکٹرز کو مذاکرات کے ذریعے مسئلہ حل کرنا چاہیے تاکہ مریضوں کو مزید اذیت کا سامنا نہ کرنا پڑے۔ گرینڈ ہیلتھ الائنس نے مطالبہ کیا ہے کہ سرکاری ہسپتالوں کی نجکاری کا فیصلہ فوری واپس لیا جائے، بصورت دیگر احتجاج کا دائرہ مزید بڑھایا جائے گا۔
واضح رہے کہ گرینڈ ہیلتھ الائنس کے دھرنے کے خلاف پولیس نے رات گئے بڑا ایکشن کر کے مظاہرین کو حراست میں لیا تھا اور مال روڈ پر لگے ٹینٹ اکھاڑ دیئےتھے۔
