پاک بھارت کشیدگی کے دوران بھارتی میڈیا پر فیک نیوز اور افواہوں کا بازار گرم ہے۔ بھارتی میڈیا نے پاک بھارت کے درمیان جاری کشیدگی کے حوالے سے جھوٹی خبریں نشر کرنا شروع کردیں۔ جس پر خود بھارتی صحافی اور یوٹیوبرز تنیقد کرتے نظر آئے۔
بھارتی صحافیوں کے مطابق بھارتی میڈیا بشمول نیوز ٹی وی چینلز آج تک، زی نیوز اور این ڈی ٹی وی جھوٹ پر مبنی خبریں چلا رہے ہیں۔ اسی حوالے سے سوشل میڈیا پر ایک بھارتی نیوز چینل ’آج تک‘ کا ایک ویڈیو کلپ سوشل میڈیا پر وائرل ہو رہا ہے جس میں نیوز اینکر اپنے چینل کی جانب سے چلائی گئی جعلی خبروں پر معافی مانگ رہی ہیں۔
ایک صارف نے اس پر تبصرہ کرتے ہوئے کہا کہ سینیر اینکرز کی جانب سے مسلسل گمراہ کن اور پرانی ویڈیوز/تصاویر شیئر کی جاتی رہیں لیکن معافی دوسرے اینکرز سے منگوائی جاتی ہے یہ کیا خوب انصاف ہے۔
اویس بھٹ نے لکھا کہ جعلی خبریں دینے والے چینلز کے خلاف سخت کارروائی کرنی چاہیے۔
ایک صارف نے لکھا کہ کوئی اب بھارتی میڈیا پر یقین نہیں کرے گا، ان کی ساکھ پہلے ہی خراب تھی، اور یہ بات مشہور ہے کہ وہ ہندو اور مسلمانوں کے درمیان نفرت پھیلاتے ہیں۔ انہوں نے مزید کہا کہ اب ان جھوٹوں نے ان نیوز چینلز کی بچی کھچی ساکھ بھی ختم کر دی ہے۔
زارا خان نے لکھا کہ بھارتی میڈیا کی ساکھ ایک ہی دن میں ایسے گر گئی جیسے ان کے رافیل گرے تھے۔
ایک ایکس صارف نے لکھا کہ گودی میڈیا معافی مانگ رہا ہے۔
دوسری جانب معروف بھارتی یوٹیوبر دھرو راٹھی نے بھی اپنے فالوورز سے درخواست کی کہ ان دھوکہ بازوں کو اپنے ایکس اکاؤنٹس سے بلاک کر دیں۔ اور ان جعلی نیوز چینلز کو دوبارہ کبھی نہ دیکھیں۔
