چوہے عام طور پر اچھی شہرت کے مالک نہیں ہوتے، لیکن ایک خاص چوہا ’رونن‘ دنیا بھر میں چوہوں کی عزت بحال کرنے میں لگا ہوا ہے۔ رونن کا شمار اُن چند خاص چوہوں میں ہوتا ہے جو اپنی غیر معمولی سونگھنے کی صلاحیت کی بدولت زمین میں چھپی ہوئی خطرناک بارودی سرنگوں کو تلاش کرتے ہیں اور بے گناہ لوگوں کی جانیں بچاتے ہیں۔
رونن، جس کا تعلق افریقی نسل کے دیوہیکل پاؤچڈ چوہوں سے ہے، نے حال ہی میں ایک نیا عالمی ریکارڈ قائم کیا ہے۔ اگست 2021 سے فروری 2025 تک، اس ہوشیار چوہے نے کمبوڈیا کے علاقے سییم ریپ کے قریب 109 بارودی سرنگیں اور 15 دیگر خطرناک دھماکہ خیز مواد دریافت کیے۔ یہ ریکارڈ گنیز ورلڈ ریکارڈز میں شامل کیا گیا ہے۔
رونن کے ٹرینر ’فینی‘ نے گنیز کو بتایا، ’رونن کی کامیابیاں اس بات کا ثبوت ہیں کہ چوہے کتنا زبردست کام کر سکتے ہیں۔‘
لیکن دوستو! کیا یہ تربیت کا کمال نہیں؟
کمبوڈیا ایک ایسا ملک ہے جہاں گزشتہ جنگوں کی وجہ سے زمین میں لاکھوں بارودی سرنگیں دبی ہوئی ہیں۔ 1979 سے اب تک وہاں ان بارودی سرنگوں کی وجہ سے 65 ہزار سے زیادہ افراد ہلاک یا زخمی ہو چکے ہیں۔ ان سرنگوں کو تلاش کرنا نہایت مشکل اور جان لیوا کام ہوتا ہے، کیونکہ یہ زمین میں چھپی ہوتی ہیں اور انسانوں یا جانوروں کے گزرنے پر پھٹ جاتی ہیں۔
یہی وہ کام ہے جو رونن اور اس جیسے تربیت یافتہ چوہے کرتے ہیں۔ ان کی ناک انتہائی حساس ہوتی ہے، جس کی مدد سے یہ دھماکہ خیز مواد کی بو سونگھ کر اپنے ٹرینرز کو آگاہ کر دیتے ہیں۔ ان کا جسم ہلکا ہوتا ہے، اس لیے وہ خود سرنگ کو نہیں چھیڑتے۔
رونن تنزانیہ میں پیدا ہوا اور اب اس کی عمر 5 سال ہے۔ یہ عام چوہے کی نسبت کہیں بڑا ہے، اس کی لمبائی دو فٹ سے زیادہ اور وزن تقریباً 2.6 پاؤنڈ ہے، جو تقریباً ایک بلی جتنا ہوتا ہے۔
