عالمی ویب انفراسٹرکچر فراہم کرنے والی کمپنی کلاؤڈ فلیئر جمعے کے روز اچانک بندش کا شکار ہوگئی، جس کے باعث دنیا بھر میں متعدد بڑی ویب سائٹس اور آن لائن خدمات متاثر ہوئیں۔
کمپنی کی جانب سے جاری کردہ سرکاری بیان میں کہا گیا کہ کلاؤڈ فلیئر اپنے ڈیش بورڈ اور متعلقہ اے پی آئیز میں درپیش مسائل کی تحقیقات کر رہا ہے۔
کلاؤڈ فلیئر کے وسیع نیٹ ورک کے مختلف حصے متاثر ہونے کے باعث صارفین کو 500 انٹرنل سرور ایررز، ناکام درخواستوں اور ٹوٹے ہوئے انٹیگریشنز جیسے مسائل کا سامنا کرنا پڑا۔
آؤٹیج پر نظر رکھنے والے آزاد پلیٹ فارم ڈاؤن ڈیٹیکٹر کے مطابق کلاؤڈ فلیئر کی بندش جمعہ کے روز یعنی 5 دسمبر کو پاکستانی وقت کے مطابق رات ایک بجے اپنے عروج پر تھی۔
واضح رہے کہ کلاؤڈ فلیئر دنیا بھر میں انٹرنیٹ انفراسٹرکچر اور ویب سیکیورٹی خدمات فراہم کرنے والی ایک بڑی کمپنی ہے۔
کمپنی نے اپنے اسٹیٹس اپڈیٹ میں سرکاری طور پر بندش تسلیم کرتے ہوئے کہا کہ ان کا پورٹل مسائل کا سامنا کر رہا ہے اور صارفین کو مختلف آن لائن سروسز تک رسائی میں رکاوٹ پیش آسکتی ہے۔
