اسلام آباد اور راولپنڈی میں تحریک لبیک پاکستان (ٹی ایل پی) کے احتجاج کے باعث دوسرے روز بھی معمولاتِ زندگی بری طرح متاثر رہے۔ راستوں کی بندش اور سیکیورٹی ہائی الرٹ کے باعث شہریوں کو شدید مشکلات کا سامنا ہے۔
تجارتی اور تعلیمی سرگرمیاں معطل
میڈیا رپورٹس کے مطابق راستے بند ہونے کے باعث جڑواں شہروں میں تجارتی سرگرمیاں معطل ہیں جبکہ تعلیمی ادارے بھی بند کر دیے گئے ہیں۔
ممکنہ احتجاج کے پیش نظر میٹرو بس سروس دوسرے روز بھی بند رہی، اور فیض آباد کے اطراف ہوٹل و ریسٹورنٹس سیل کر دیے گئے۔
اہم شاہراہیں مکمل طور پر سیل
فیض آباد انٹرچینج، ایکسپریس وے، آئی جے پی روڈ، کھنہ پل، کری روڈ اور ڈھوک کالا خان کے راستے تاحال بند ہیں۔ اسی طرح وارث خان، کمیٹی چوک، شمس آباد، شاہین چوک، صدر اور پرانے ایئرپورٹ سے آنے والے تمام راستے بھی سیل کر دیے گئے ہیں۔
ٹریفک اور انٹرنیٹ پر پابندیاں
راولپنڈی انتظامیہ نے شہر میں ہیوی ٹریفک کے داخلے پر مکمل پابندی عائد کر رکھی ہے، جبکہ ایئرپورٹ جانے والے راستوں کو کنٹینرز لگا کر بند کر دیا گیا ہے۔ جڑواں شہروں میں موبائل انٹرنیٹ سروس بھی دوسرے روز معطل رہی۔
