چینی اسمارٹ فون ساز کمپنیاں اب اگلی نسل کی ایسی ٹیکنالوجی پر کام کر رہی ہیں جو صارفین کے لیے اسمارٹ فون کے فرنٹ کیمرے کو بالکل ’غائب‘ کر دے گی، یعنی اسکرین کے نیچے چھپا ہوا سیلفی کیمرا، جو نہ صرف تصویر کھینچ سکے گا بلکہ جدید ترین 3D چہرہ شناسائی (فیس ریکگنیشن) بھی فراہم کرے گا۔
معروف ٹیک لیکر ’ڈیجیٹل چیٹ اسٹیشن‘ کے مطابق، کچھ چینی کمپنیوں نے ایسے اینڈرائیڈ فونز کی اندرونی جانچ شروع کر دی ہے جو تھری ڈی فیس اسکیننگ کے ساتھ انڈر ڈسپلے کیمرہ فراہم کریں گے۔ اس ٹیکنالوجی کو ایپل کے فیس آئی ڈی کا مقابل سمجھا جا رہا ہے، کیونکہ ایپل اب تک تھری ڈی چہرہ شناسائی میں سب سے کامیاب اور قابلِ اعتماد ٹیکنالوجی پیش کرتا آیا ہے۔
اگرچہ رپورٹ میں کسی خاص کمپنی یا ماڈل کا نام نہیں لیا گیا، لیکن چینی مارکیٹ کے رجحانات کو دیکھتے ہوئے یہ اندازہ لگایا جا رہا ہے کہ ZTE اور Honor جیسی کمپنیاں اس ٹیکنالوجی کی دوڑ میں شامل ہو سکتی ہیں۔
مثال کے طور پر، Honor کا Magic 7 Pro ان چند اینڈرائیڈ فونز میں سے ایک ہے جس میں تھری ڈی فیس ریکگنیشن موجود ہے، جب کہ ’زیڈ ٹی ای‘ کی نوبیا سیریز میں پہلے ہی انڈر ڈسپلے کیمرے متعارف ہو چکے ہیں، جیسے Z70S Ultra۔ تاہم، اب تک کوئی ایسا فون مارکیٹ میں نہیں آیا جس میں یہ دونوں جدید فیچرز ایک ساتھ ہوں۔
اس ٹیکنالوجی کو ایک ہی ڈیوائس میں ضم کرنا تکنیکی لحاظ سے نہایت مشکل ہے، کیونکہ 3D چہرہ شناسائی میں انفراریڈ سینسرز اور لائٹ پروجیکشن سسٹم استعمال ہوتے ہیں جنہیں اسکرین کے نیچے چھپانا آسان نہیں۔ دوسری طرف، انڈر ڈسپلے سیلفی کیمروں کی تصویری کوالٹی بھی اب تک روایتی کیمروں کے مقابلے میں کم رہی ہے۔
ان تمام چیلنجز کے باوجود، اگر کمپنیاں اس نئی ٹیکنالوجی کو کامیابی سے متعارف کرانے میں کامیاب ہو گئیں، تو یہ موبائل ڈیزائن میں ایک بڑی تبدیلی ثابت ہو سکتی ہے، جہاں مکمل فل اسکرین فونز کے ساتھ محفوظ اور تیز رفتار چہرہ شناسائی کا تجربہ بھی ممکن ہوگا۔
